Almatyda 5345 balanyń ata-anasy týý týraly kýálikti SMS arqyly jasatqan
Munyń barlyǵy «Azamattarǵa arnalǵan úkimet» memlekettik korporatsııasy men «Ulttyq aqparattyq tehnologııalar» AQ birige otyryp jasaǵan birneshe pılottyq jobanyń arqasynda júzege asyp otyr. Azamattar men memlekettiń arasyndaǵy qatynasty retteýdegi tsıfrlyq jetistikter týraly QazAqparat tilshisine «Azamattarǵa arnalǵan úkimet» memlekettik korporatsııasy Almaty qalasy boıynsha fılıalynyń menedjeri Jańyl Ápetova aıtyp berdi.
Búginde balasyna kýálik nemese jórgekpul alý úshin memorgandardyń tabaldyryǵyn tozdyrý jas analarǵa qıyndyq týǵyzary sózsiz. Osy oraıda byltyrdan bastap sábıli bolǵan ata-analarǵa kórsetiletin qyzmetterdiń proaktıvti ádisi boıynsha pılottyq joba iske qosylǵan bolatyn. Sodan bergi ýaqytta respýblıka boıynsha 100 myńnan asa jas bosanǵan ana arnaıy SMS arqyly nárestesin tirkeý qyzmetin paıdalanǵan.
«Azamattarǵa arnalǵan úkimet» memlekettik korporatsııasy Almaty qalasy boıynsha fılıalynyń menedjeri Jańyl Ápetovanyń aıtýynsha, jańa bosanǵan anaǵa avtomatty túrde onyń sábıine beretin aty-jónin surap, arnaıy habarlama keledi.
«Basqa málimetterdi tirkeýshi organ tıisti aqparattyq júıelerden jınap, al ózge derekterdi SMS habarlama arqyly ata-anadan suraıdy. Sondaı-aq, telefon arqyly shot nómirin jiberip, járdemaqylardy rásimdeýge jáne balabaqshaǵa kezekke qoıýǵa, sábıdi turǵylyqty jeri boıynsha avtomatty túrde tirkeýge bolady», - dedi Jańyl Ápetova.
Sábıli bolǵan ata-ana kýálikti HQKO-dan alyp ketse bolady. Tipti úıge jetkizý qyzmetin paıdalanýǵa da jaǵdaı jasalǵan. Alaıda, proaktıvti qyzmetke qol jetkizý úshin mobıldi azamattar bazasyna tirkelý qajet.
«Ol úshin azamattar portaldaǵy jeke kabınetinde telefon nómirin jeke sáıkestendirý nómirine baılanystyryp qoıýy kerek. Ony azamattar halyqqa qyzmet kórsetý ortalyǵyndaǵy «Connection point» ózine-ózi qyzmet kórsetý sektoryn paıdalanyp, qajet bolǵan jaǵdaıda operatordyń keńesine júginý arqyly jasaı alady», - dedi maman.
23 jastaǵy jas ana Aqerke Saǵıtova 21 qazanda №2 perzenthanada uldy boldy. Jas otbasynyń tuńǵysh uly kelesi kúni-aq Qazaqstan azamaty bolyp shyǵa keldi.
«Telefonyma quttyqtaý keldi. Kýálikti SMS arqyly jasattyq. Kelesi kúni daıyn boldy degen soń joldasym baryp alyp keldi. Sóıtip, Mırlanym bir kún ishinde Qazaqstan azamaty bolyp shyǵa keldi. Óte yńǵaıly, eshqaıda baryp balamen kezek kútken joqpyz», - deıdi Aqerke Saǵıtova.
Elimizde bıylǵy 10 aıda 100 myń ana proaktıvti qyzmet jaıly sms-habarlamaǵa jaýap berdi. Onyń 59 myńy balanyń týý týraly kýáligin rásimdedi, 18 myń bala balabaqsha kezegine qoıyldy, 11 myńnan asa áıel eki túrli áleýmettik tólem alý úshin qujat rásimdedi.
Al Almatyda jarty jylda 11 013 balanyń anasyna SMS quttyqtaý kelgen, 5345 ana balasynyń kýáligin onlaın alǵan. 1883 bala balabaqshaǵa kezekke tursa, 870 otbasyǵa járdemaqy taǵaıyndaldy.
Al jyl basynan bergi 10 aıda Almatyda 3 236 687 qyzmet kórsetilgen. Onyń ishinde 1 280 472 qyzmet elektrondy formatta boldy.
Sonymen qatar, osy jyldyń mamyr aıynda qosylǵan telegram-bot servısi arqyly da memlekettik qyzmetterdi alýǵa bolady. «Aqparattyq tehnologııalar» AQ iske qosqan bot arqyly 15 memlekettik qyzmet pen servıs qoljetimdi. Bot arqyly ózińizge jaqyn jerde ornalasqan HQO týraly bilip, sondaı-aq bala týýǵa baılanysty proaktıvti qyzmetterdi alý múmkindigi bar. Basqasha aıtqanda, týý týraly kýálikke tapsyrys berý, bala týý boıynsha járdemaqylardy rásimdeý jáne sábıdi balabaqshaǵa kezekke qoıý tipti jeńildeı tústi.
Ol úshin «Mobıldi azamattar bazasyna» tirkelý qajet, ıaǵnı eGov.kz portalyndaǵy jeke kabınette telefon nómirińizdi JSN-ge bekitip, óz gadjetińizdegi Telegram messendjerinde botty iske qosý kerek.
Sosyn aldyn ala belgilengen komandalardy joldap, SMS-kodpen rastaý arqyly anyqtamalar men servıster týraly aqparatty surata alasyz. Sondaı-aq barlyq aqparatty qoldanýshynyń elektrondy poshtasyna joldaý múmkindigi de qarastyrylǵan.
Búginde Qazaqstanda telegram-bot arqyly 3 myńnan asa balanyń týý týraly kýáligi rásimdelip,1300 bala balabaqsha kezegine qoıyldy. 500-den asa ana áleýmettik tólem rásimdedi.
Sonymen qatar, «Azamattarǵa arnalǵan úkimet» memlekettik korporatsııasy tsıfrlandyrý naýqanyn nasıhattap, eldiń saýatyn ashýda barlyq tásilderdi qolǵa alǵan. Atap aıtqanda, áleýmettik jelide SMS arqyly proaktıvti qyzmetti paıdalanǵan ata-analar arasynda baıqaý jarııalady. Ol úshin analar SMS arqyly balańyzdy qalaı tirkegenińiz týraly post jazýy, korporatsııany fotoda belgileýi, postqa #ProaktıvtiPerzent heshtegin qoıýy kerek. Korporatsııa eń qyzyqty posttardy tańdap, repost jasaıdy. Sondaı-aq, eń kóp lúpil jınaǵan post avtoryna arnaıy syılyq beriledi.
Memleket basshysy óziniń 5 qazandaǵy Joldaýynda Qazaqstanda 2019 jyly memlekettik qyzmetterdiń 80%-yn, 2020 jyly 90%-yn elektrondy formatqa kóshirýdi mindettegen bolatyn.
