Almatyda 53 myń oqýshynyń kompıýteri joq
ALMATY. QazAqparat - Almaty ákimi Baqytjan Saǵyntaev «Almaty» telearnasyndaǵy tikeleı efır arqyly jańa oqý jylyna daıyndyq qalaı júrip jatqanyn aıtty, dep habarlaıdy QazAqparat tilshisi.
«Oqý jylynyń sońynda qashyqtan oqý formatyna kóshkende daıyndyqtyń joqtyǵy belgili boldy. Alaıda qysqa ýaqytta telearna men ınternet arqyly túrli baǵdarlamalar, onlaın kýrstar jasaqtaldy. Osy tájirıbeni eskere otyryp, biz keler oqý jylyna daıyn ekendigimizdi aıtqym keledi», - dedi ákim.
Qala basshysynyń aıtýynsha, 53 myń balanyń kompıýkterlik tehnıkasy joq.
«Biz byltyrǵy oqy jylynda ata-analardyń smartfonyn qoldanýǵa ruqsat berip amaldadyq. Alaıda, kishkentaı balalarǵa smartfon arqyly oqý qolaısyz. Sondyqtan, 22 myń planshet satyp alamyz. Olardy muqtaj otbasylarǵa taratamyz. Taǵy 5 myń planshet mektep qorlary arqyly alynady. Qalǵan balalarǵa mektep qoryna arnap noýtbýk satyp alyp, ýaqytsha paıdalanýǵa berip otyramyz», - dedi qala basshysy.
Ákim, sondaı-aq, Almatydaǵy ǵalamtor jaǵdaıynyń sheshiletinin de tilge tıek etti.
«Byltyr Dýman jáne Qaırat shaǵyn aýdandarynda ǵalamtor jelisi jaqsy ustamaıtynyn túsindik. Qala boıynsha 69 núkteni aralap, qaı jerde jeli nashar ekendigin anyqtadyq. Qazir osy baǵytta tıisti mınıstrlikpen birge jumys júrip jatyr. Qalanyń barlyq aýdandarynda ınternet jyldamdyǵy 7 megabıt bolýy tıis. Bul jumystardy 1 qyrkúıekke deıin aıaqtaý kerek», - dedi Saǵyntaev.
