Almatyda 53 mln teńge urlaǵan hakerlerge qatysty sot úkimi shyqty
Tergeýshilerdiń nusqasy boıynsha topqa Almaz Omarov jáne Baýyrjan Dastarov jetekshilik etken. Olar QR QK-niń 8-baby boıynsha jaýapqa tartylyp otyr.
«Almaz Omarov QR Qylmystyq kodeksiniń 188, 24, 208, 262 baptary boıynsha kináli dep tanylyp, múlki tárkilene otyryp, 7 jyl 6 aıǵa sottaldy jáne oǵan 5 jyl kompıýter tehnologııasyna baılanysty qyzmetten shekteý jazasy taǵaıyndaldy», - dedi úkimdi jarııa etken sýdıa Roman Selıtskıı.
Ol jazasyn jalpy rejimdegi túzeý kolonııasynda óteıdi.
Al Baýyrjan Dastarov da múlki tárkilene otyryp, 7 jyl 6 aıǵa bas bostandyǵynan aıryldy. Sonymen qatar, oǵan da 5 jyl kompıýter tehnologııasyna qatysty qyzmetpen aınalysýǵa tyıym salyndy. Sottalýshy endi jazasyn jalpy rejimdegi túzeý kolonııasynda óteıtin boldy.
Qalǵan qylmystyq top múshelerine ártúrli merzim boıynsha jaza kesildi. Qylmystyq is 121 tomnan turady. Ol boıynsha 45 jábirlenýshi iske tartylyp, 58 adam kýálik berdi.
Kıberqylmyskerler keltirgen shyǵyn kólemi - 53 mln teńge.
Tergeýshilerdiń nusqasynda Omarov men Dastarov QR Bas Prokýratýrasy, Salyq komıteti, Qarjy mınıstrligi syndy birqatar memleket organdar atynan 1S býhgalterııa baǵdarlamasy bar kásiporyndardyń elektrondy poshtalaryna vırýsy bar hattar joldaǵan.
Hatty alýshylar joldanǵan silteme arqyly kirip, kompıýterge qaterli baǵdarlamanyń enýine jol ashqan. Osylaı qoldanýshylardyń kompıýterlerine alystan kirgen hakerler memlekettik jáne jeke kásiporyndardyń aqshalaryn arnaıy esep shottarǵa aýdaryp alǵan. 
