Almatyda 524 saýda nysany zańsyz jumys istep tur

ALMATY. QazAqparat – Almaty ákimdigi statsıonarlyq emes saýda nysandaryn ornatý men paıdalaný jónindegi jańa erejelerdi bekitti. Bul týraly qala basshysy Erbolat Dosaev Medeý aýdanynyń turǵyndarymen kezdesýde aıtty, dep habarlaıdy QazAqparat tilshisi.

«Qalada barlyǵy zań aıasynda jumys isteýi kerek. Bul – ózara syılastyqtyń máselesi. Árkim óz mindetin oryndaýy tıis. Biz statsıonarlyq emes saýda nysandaryn ornatý jáne paıdalaný jónindegi jańa erejelerdi qalalyq máslıhatqa usyndyq. Sebebi, qalada zańdastyrylmaǵan 524 saýda nysany bar. Olardyń jumys isteýine múmkindik beretin birde-bir ruqsat qaǵazy joq», - dedi Erbolat Dosaev.
Ol sondaı-aq atalmysh másele onyń tikeleı nazarynda ekenin aıtty.
«Qala tabysynyń 4-ten 3-bóligi shaǵyn jáne orta bıznesten keledi. Sondyqtan barlyǵy zań aıasynda rettelýi kerek. Men bul máselemen jeke aınalysýǵa daıynmyn», - dedi Almaty qalasynyń ákimi Erbolat Dosaev.