Almatyda 500-den astam zańsyz jumys istegen saýda oryndary anyqtaldy
Bul týraly Óńirlik kommýnıkatsııalar qyzmetinde ótken baspasóz máslıhatynda qalalyq Kásipkerlik jáne ınvestıtsııalar basqarmasynyń basshysy Berik Soltanbaev aıtty, dep habarlaıdy QazAqparat tilshisi.
Spıkerdiń sózinshe, 2022 jyly júrgizilgen monıtorıng nátıjeleri boıynsha megapolıste 500-den astam zańsyz ornatylǵan statsıonarlyq emes saýda nysandary anyqtaldy. Zańsyz ornatylǵan pavılondar men dúńgirshekter elektr jelisine qosylǵan, keıbirinde jylý da bar.
«Biz qazirdiń ózinde zańsyz statsıonarlyq emes saýda nysandarynyń menshik ıelerimen óz erkimen demontajdaý boıynsha túsindirý jumystaryn júrgizip jatyrmyz. Sondyqtan, aldaǵy ýaqytta statsıonarlyq emes saýda nysandaryn ózdiginen salýdy boldyrmaý úshin Almatynyń qalalyq josparlaý jáne ýrbanıstıka basqarmasy statsıonarlyq emes saýda nysandaryn ornalastyrý shemalaryn ázirleýde. Osylaısha, endi statsıonarlyq emes saýda nysandaryn qatań túrde osy shemaǵa sáıkes ornatýǵa ruqsat etiledi», - dedi Berik Soltanbaev.
Aıtýynsha, ornalastyrý shemalary bekitilgennen keıin 2023 jyldyń ekinshi toqsanynda jergilikti atqarýshy organdar zańsyz statsıonarly emes saýda nysandaryn demontajdaý jumystaryn bastaıdy. Mundaı «núkteler» ınjenerlik jelilerden ajyratylady.
«Erejege baǵynbaıtyn saýdagerlerge qatysty QR ÁQBtK-niń 204 jáne 505-baptary boıynsha aıyppul túrindegi ákimshilik sharalar qoldanylatyn bolady»,- dep atap ótti spıker.
