Almatyda 500-den asa bala jańajyldyq qaıyrymdylyq shyrshasyna qatysty
ALMATY. Jeltoqsannyń 21-i. QazAqparat /Názıra Eleýhan/ - Almatyda Memlekettik «Gúlder» ansambli jetim balalar men ata-analarynyń qamqorynsyz qalǵan balalarǵa arnap qaıyrymdylyq jańajyldyq shyrsha ótkizdi,
dep habarlaıdy QazAqparat.
Atalmysh shara «Ordabasy» korporatsııasy men Dáýlet Turlyhanovtyń sport mektebiniń qoldaýymen jáne Memlekettik «Gúlder» ansambliniń uıymdastyrýymen ótti.
Jańa jyldyq shyrshaǵa qatysyp, «Gúlder» ansambliniń kontsertin tamashalaýǵa qalamyzdyń №1, 2, 8-shi, sondaı-aq «Januıa» balalar úıi men mektep ınternatynyń 500-den asa oqýshylary men tárbıelenýshileri shaqyrylǵan.
«Sharany uıymdastyrýdaǵy negizgi maqsatymyz - jańajyldyq mereke aldynda, ata-ananyń jylýynan aıyrylǵan balalarǵa qýanysh syılaý, qamqorlyǵymyzdy kórsetý bolyp tabylady. Mundaı sharany dástúrli túrde ótkizbesek te, múmkindigimiz kelgenshe árqashan balalarǵa basqa merekelerde de qýanysh syılaýǵa tyrysamyz», dedi belgili sazger, ári ánshi, Qazaqstannyń eńbek sińirgen qaıratkeri, Memlekettik «Gúlder» ansambliniń dırektory Jeńis Seıdollauly.
Merekelik kontsertten keıin uıymdastyrýshylar balalarǵa jańajyldyq syılyqtaryn tabystady.
