Almatyda 50 balaǵa arnalǵan jekemenshik balabaqsha ashyldy
ALMATY. Qarashanyń 20-sy. QazAqparat / Ádilet Musahaev / - Búgin Almaty qalasynyń Medeý aýdanynda «Assortı bebı» atty jekemenshik balabaqshanyń ashylý rásimi ótti,
dep habarlaıdy QazAqparat.
Balabaqshada búgingi kúni 4 tárbıeshi jáne 4 oqytýshy jumys isteıdi. Sondaı-aq balalar úshin horeografııa, aǵylshyn tilin úıretý, sport, mýzyka bólmeleri ashylǵan. Tárbıe QR Bilim jáne ǵylym mınıstrligi bekitken «Balbóbek» oqý baǵdarlamasyna sáıkes iske asýda. Sonymen qatar 50 balaǵa arnalǵan bul balabaqshada 2-5 jas aralyǵyndaǵy 20 bala tárbıelenýde.
«Qazirgi ýaqytta aýdanymyzda 19 balabaqsha jumys istep jatyr, onyń 15-i ókimet tarapynan ashylǵan, 3 vedomstvolyq jáne 2 jekemenshik balabaqsha tirkelgen. Bul balabaqshalarda 3417 bala tárbıelenip jatsa, 3500-deı bala oryn jetispegendikten kezekte tur. Memleket basshysy N. Nazarbaev jaqynda tikeleı efır arqyly kezinde memleket menshiginde bolǵan burynǵy balabaqshalar men mekemelerdi memleketke qaıtarý kerektigin jáne mektepke deıingi mekemelerdi kásipkerlermen birlesip ashý ózekti bolyp turǵanyn aıtqan edi. Mine osy másele boıynsha kásipkerlermen birlesip jumys istep jatyrmyz», deıdi Medeý aýdanynyń ákimi Mahambet Beıdáli. Sonymen qatar, ol sońǵy 9 aıdaǵy bala týý kórsetkishi byltyrǵy jylǵa qaraǵanda 311 balaǵa artyp otyrǵandyǵyn jáne olardy balabaqshamen qamtý baǵytynda kóptegen jumystar atqarylatyndyǵyn jetkizdi.
«Osy balabaqshany ashý máselesi kópten kókeıimde júrgen edi, óıtkeni balalarymdy balabaqshaǵa aparǵan kezde, oryn bolmaı kóptegen qıyndyqtardy basymnan ótkerdim. Mine sondaı kedergilerdi eskere otyryp, ákimshiliktiń jáne bilim departamentiniń qoldaýymen barlyq talaptarǵa saı balabaqsha ashtyq dep oılaımyn», deıdi balabaqshanyń quryltaıshysy Rýfııa Jamalbekova.
