Almatyda 50 adamnyń aqshasyn jymqyrǵan «L-Kapıtal» kompanııasynyń jetekshisi ustaldy
ALMATY. QazAqparat - Almaty polıtseıleri «L-Kapıtal» kompanııasynyń negizin qalaýshyny ustady, dep habarlaıdy QazAqparat tilshisi.
Almaty qalasynyń PD tergeý basqarmasynyń málimetinshe, jedel-izdestirý sharasy barysynda 1962 jyly týǵan azamatsha ustaldy.
Ol QRQK 128-babyna sáıkes ýaqytsha ustaý ızolıatoryna qamaldy.
Atalǵan kompanııanyń salymshylarynyń túsirgen ujymdyq aryzyna sáıkes, QR QK 217-babynyń 3-bóligi boıynsha sotqa deıingi tergeý bastalǵanyn buryn habarlaǵan bolatynbyz.
Vedomstvoaralyq tergeý-jedel toby quryldy.
Kompanııa keńselerinde sanktsııalanǵan tintý júrgizildi.
Tolyqtyq, obektıvtilik jáne jan-jaqtylyq prıntsıpterin qatań saqtaı otyryp júrgizilgen tergeý kesheni barysynda mán-jaı anyqtalyp, protsessýaldyq sheshim qabyldanady.
«Qazirgi ýaqytta qylmystyq is boıynsha 50 adam jábirlenýshi retinde tanylǵan»,– dedi Almaty qalalyq polıtsııa departamenti bastyǵynyń orynbasary Rústem Ábdirahmanov.
Eske sala keteıik, munyń aldynda Almaty polıtseıleri «L-Kapıtal» kompanııasynan zardap shekken salymshylarǵa júgingen bolatyn.
