Almatyda 5 nysan senimgerlik basqarýǵa berildi

ALMATY. QazAqparat- Almatyda jyl basynan beri 5 nysan keıinnen satyp alý quqyǵynsyz senimgerlik basqarýǵa berildi. Bul týraly Óńirlik kommýnıkatsııalar qyzmetinde ótken baspasóz máslıhaty barysynda qalalyq Memlekettik aktıvter basqarmasynyń basshysy Abzal Egemberdıev málim etti, dep habarlaıdy QazAqparat tilshisi.

Spıkerdiń sózinshe, megapolıste bıyl 5 nysan senimgerlik basqarýǵa berildi. Olardyń ishinde, 5 jyl merzimge deıin satyp alý quqyǵynsyz 20 sanıtarlyq-gıgıenalyq torap, aýǵan soǵysyna qatysqan ardagerler men múgedekterdi qoldaý boıynsha ortalyq ashý úshin Áýezov aýdany, 5 yqsham aýdany, 58 A meken jaıynda ornalasqan ǵımarat bar.

«Sonymen qatar 5 jyl merzimge deıin satyp alý quqyǵynsyz Alataý aýdany, Soltústik aınalym, 58/3 meken jaıy boıynsha ornalasqan aqyl-kemistigi bar adamdarǵa qoldaý kórsetýge arnalǵan «Trenıng-kafe» ashýǵa arnalǵan ǵımaraty. Jetisý aýdanynyń «Baqytty otbasy» ortalyǵyn ashý úshin Jetisý aýdany, Jansúgirov kóshesi, 65/34 úı, Lomonosov kóshesiniń buryshy meken jaıynda ornalasqan ǵımarat jáne Almaly aýdanynyń «Baqytty otbasy» ortalyǵyn ashý úshin Naýryzbaı batyr kóshesi, 106a meken jaıynda ornalasqan ǵımarat senimgerlik basqarýǵa berildi»,- dedi spıker.

Onyń aıtýynsha, memlekettik múlikti senimgerlik basqarýǵa berý Qazaqstan Respýblıkasy Ulttyq ekonomıka mınıstriniń 2015 jylǵy 16 qańtardaǵy № 17 buıryǵymen bekitilgen Memlekettik múlikti senimgerlik basqarýǵa berý erejelerine jáne Memlekettik múlikti senimgerlikpen basqarý týraly úlgi shartqa sáıkes júzege asyrylady.

«Nysandy senimgerlik basqarýǵa berý e-qazyna.kz reestriniń veb-portalynda tender ótkizý jolymen júzege asyrylady, onda tenderdi memleket úshin eń jaqsy degen usynystar jasaǵan qatysýshy utady»,- dedi ol.