Almatyda 5 myń teńge para almaq bolǵan ádilet departamentiniń bas mamany ustaldy
ASTANA. Aqpannyń 10-y. QazAqparat /Aıdar Ospanalıev/ - Almaty oblystyq Uıymdasqan qylmysqa qarsy kúres basqarmasnyń qyzmetkerleri anyqtama jazyp bergeni úshin 5 myń teńge para almaq bolǵan Ádilet departamentiniń bas mamanyn qylmys ústinde qolǵa túsirdi.
Bul oqıǵa jóninde búgin jýrnalıstermen bolǵan aptalyq brıfıngte Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov aıtyp berdi, dep habarlaıdy QazAqparat.
Sondaı-aq departament bastyǵynyń málimetterine qaraǵanda, aqpannyń 2-si kúni Qaraǵandyda belgisiz eki azamat kóshede ketip bara jatqan áıel azamattyń aqsha, uıaly telefon men qujattary salynǵan sómkesin julyp alyp qashqan. «Tártip saqshylary osy qylmysqa qatysy bolýy múmkin degen kúdikpen jergilikti eki turǵyndy ustap, olar ózderi jasaǵan áreketterin moıyndaǵan. Qazirgi tańda qaraqshylardyń aımaqtaǵy ózge de qylmystarǵa qatystylyǵy tekserilýde», dedi Q.Jumanov.
Departament bastyǵy sonymen qatar Aqtóbe oblysynda jalǵan qujattar jasaýmen aınalysqan alaıaqtardyń ustalǵandyǵyn aıtty. Onyń málimetterinshe, Aqtóbe oblystyq Іshki ister departamentine aımaqta belgisiz bireýlerdiń túrli qujattar men esep berý blankilerin jáne ýaqytsha júrgizýshi kýáligi men joǵary bilim alǵandyǵy týraly dıplom jasaýmen sondaı-aq ózge de birqatar qujattar jasaýmen aınalysatyn top bar ekendigi jóninde qupııa málimet kelip túsken. «Atalmysh málimet boıynsha osy aımaqtaǵy baspa ónimderimen aınalysatyn jaýapkershiligi shekteýli seriktestigi bar 48 jasar azamat ustaldy. Odan júrgizýshige ýaqytsha beriletin kýálik talondary men qaýipsizdik qyzmetkerleriniń arnaıy daıyndyqtan ótkendigin rastaıtyn 16 blanki men Almatydaǵy joǵary oqý oryndarynyń birin bitirgendigi jónindegi dıplom tabyldy», dedi departament bastyǵy.
