Almatyda 5 myń aqyly turaq orny paıda bolady
ALMATY. QazAqparat - Almaty bıligi bolashaqta qalanyń ortalyǵynda aqyly turaq oryndaryn keńeıte túspek. Mundaı josparmen qalalyq Jolaýshylar kóligi jáne avtomobıl joldary basqarmasynyń basshysy Maqsut Isahov bólisti, dep habarlaıdy QazAqparat tilshisi.
Basqarma basshysy málimdegendeı, aqyly turaq jelisi óziniń tıimdiligin kórsetip otyr.
«Jyl sońyna deıin aqyly turaq sanyn 15 myńǵa deıin jetkizý josparda bar. Ásirese, ortalyqty adamdardyń júrýine yńǵaıly etýimiz kerek. Boljamǵa sáıkes, 10 jyldan soń avtokólikke degen suranys azaıady», - dedi Maqsut Isahov.
Onyń aıtýnysha, aqyly turaqtardan bıýdjetke eleýli túsim túsip otyr.
«Tek qana 10 kósheniń boıynda aqyly turaq jasadyq. Sonyń ózi bıýdjetke túsetin túsimdi 5 ese arttyrdy», - dedi ol.
Basqarma basshysy málimdegendeı, 2017 jyly avtoturaqtardan jalpylama 290 mln teńge tabys túsken. Buǵan ákelingen quraldardyń keden salyǵy, jumyskerlerdiń salyǵy, tikeleı aıyppuldar qosa eseptelip otyr. Al 2015 jyly bul kórsetkish 32 mln teńge bolatyn.
Aıta ketý kerek, Almatyda 2017 jyly 500 eski turaq orny demontajdalyp, 10 myń kólikke arnalǵan aqyly oryndar paıda bolǵan edi. Sonymen qatar turaq aqysy ózgermeıtin boldy. Tańǵy 8-den keshki 7-ge deıin avtojúrgizýshiler saǵatyna 100 teńge tólese, alǵashqy 15 mınýty tegin bolmaq. Al bul ýaqyttan tys sátterde júrgizýshiler turaqqa tegin qoıa alady.
