Almatyda 5 mektep oqýshy sany boıynsha qarjylandyrýǵa kóshti
ALMATY. QazAqparat - Almatyda bıyl jyldyń basynan bastap 5 mektepte jan basyna shaqqandaǵy qarjylandyrý júıesi pılottyq rejımde engizildi, dep habarlaıdy QazAqparat tilshisi.
«2017 jyldyń 1 qańtarynan bastap Almaty qalasynda pılottyq 5 mektep tańdap alyndy. Medeý aýdanyndaǵy №48 mektep lıtseıi, №77 jalpy bilim beretin mektep, №98 jalpy bilim beretin mektep, Áýezov aýdanyndaǵy №117 jalpy bilim beretin mektep, Almaly aýdanyndaǵy № 120 gımnazııada endi qarjylandyrý oqýshy sanyna qaraı beriletin boldy», - dedi qalalyq Bilim berý basqarmasynan.
QR Qarjy mınıstrliginiń taratqan aqparatyna sáıkes, qazirgi tańda jylyna 1 oqýshyǵa 206,6 myń teńge bólinip otyr.
QR Qarjy mınıstri Baqyt Sultanov bul qarajattyń kólemi artyp, 20 jylǵa amortızatsııalyq shyǵyn men muǵalimdi yntalandyrý qarjysy qosylatynyn aıtty.
Sondyqtan, bolashaqta 1 balaǵa bólinetin qarjy orta eseppen 300 myń teńgege jetýi múmkin.
Onyń aıtýynsha, mektepterdi jan basyna shaqqandaǵy qarjylandyrýǵa kóshirýge bıýdjetten 153,9 mlrd teńge qarastyrylǵan. Onyń ishinde 4,8 mlrd teńge 2018 jyly bólinedi.
Al jalpy bilim berý jáne ǵylym salasyn damytýǵa 1 108,9 mlrd teńge qarastyrylǵan.
Jańa júıe boıynsha bólinetin qarajat kólemi oqýshylardyń sanyna baılanysty bolady. Bul óz kezeginde bilim berý oryndarynyń arasynda ózara básekeni arttyrady.
Aldaǵy úshjyldyqta jan basyna shaqqandaǵy qarjylandyrýǵa kezeń-kezeńimen eldegi barlyq mektepter kóshedi.
2018 qyrkúıeginen bastap Astananyń 85 mektebi qatysady. 2019 jyldyń qańtarynan Almaty qalasynyń 239 mektebi kóshedi. 2020 jyldan bul júıege eldegi 3 981 mekteptiń barlyǵy kóshedi.
