Almatyda 5 mashına soqtyǵysty
ALMATY. QazAqparat - Almaty qalasynda 5 avtokólik soqtyǵysqan jol apaty boldy, oqıǵa kezinde bir adam jaraqat aldy, dep habarlaıdy QazAqparat tilshisi.
Jappaı soǵylǵan avtobılderdiń arasynda júk kóligi de bar.
Jol apaty T.Rysqulova kóshesiniń boıymen Á.Bókeıhanov kóshesiniń qıylysyna jete bergen tusta oryn alǵan.
Kýágerlerdiń aıtýynsha, «Leksýs» markaly kóliktiń júrgizýshisi tizginge ıe bola almaı qarsy baǵyttaǵy jolǵa shyǵyp ketip, birneshe kólikke soǵylǵan. Olardyń ishinde «Mıtsýbısı Padjero», «Folksvagen Golf», «GAZ» kommýnaldy qyzmetiniń assenızatory bar.
Sonymen qatar, jol talǵamaıtyn kólik «Folksvagen Djetta» markaly avtomobıldi de qaǵyp ótken.
Bes kólikke soǵylǵan «Leksýs» júrgizýshisi birneshe jerden jaraqat alyp, aýrýhanaǵa jetkizildi.
Qazir tártip saqshylar jol-kólik oqıǵasynyń mán-jaıyn anyqtaýda.
