Almatyda 5 kólikti qaǵyp ketken júrgizýshi ustaldy
ALMATY. QazAqparat - Almatyda urlanǵan kólikpen 5 kólikti birdeı soqqan mas júrgizýshi ustaldy, dep habarlaıdy QazAqparat tilshisi.
Oqıǵa Almatynyń Qalqaman aýdanynda bolǵan. Almaty qalasy ІІD baspasóz qyzmetiniń jetekshisi Saltanat Ázirbek kúdiktini ustaý úshin «Qolǵa túsirý» jospary jarııalanǵanyn aıtty.
«Kúdiktini «Boran-263» jol-patrýl ekıpajy ustady. 36 jastaǵy júrgizýshi ishimdikke mas bolǵan. Polıtseılerdiń zańdy talaptaryna baǵynýdan bas tartqan ol qashyp júrip birneshe kólikti zaqymdady. Qazirgi ýaqytta kúdikti qylmystyq jaýapkershilikke tartyldy. Ony qamaýǵa alý máselesi qarastyrylyp jatyr», - dedi Saltanat Ázirbek.
Kúdikti 21 aqpanǵa qaraǵan túngi saǵat 01:00 shamasynda Er Jánibek kóshesinen «Mitsubishi Galant» kóligin urlap mingen. Kólik ıesi tulparynyń urlanǵanyn tańǵy 4 shamasynda bilip, polıtsııanyń 102 nómirine habarlasqan. Osydan keıin, qalalyq ІІD kúdiktini izdeýge kirisken. Kúdikti Áshimov kóshesinde ustalǵan.
Kýágerlerdiń aıtýynsha, mas júrgizýshi Áshimov kóshesine jetpeı, aldymen polıtsııanyń KIA Cerato kóligine soǵylǵan. Sodan keıin, jol jıeginde turǵan 4 kólikti soqqan.
ІІD-niń aqparatyna súıensek, kúdikti Jambyl oblysynan kelgen.
