Almatyda 5 qańtar kúni buzaqylar KamAZ kóligimen polıtsııa departamentine basyp kirmek boldy

ALMATY. QazAqparat - Almaty polıtsııasynyń maıor shenindegi jedel ýákili polıtsııa ǵımaratyn qalaı qorǵaǵanyn aıtyp berdi. Polıtseıdiń jeke basy qyzmet etý erekshelikterine baılanysty jarııa etilmeıdi, dep habarlaıdy QazAqparat tilshisi.

Polıtsııa maıory tártipsizdikter 5 qańtar kúni tústen keıin «Almaty Arena» mańynda bastalǵanyn eske aldy.

«Arnaıy jasaq qyzmetkerleri óte agressıvti jurtty tynyshtandyrýǵa tyrysty. Olar ot jaǵyp, kósheni jaýyp tastady. Olardyń mas kúıinde ekeni kórinip turdy. Qalaı bolǵanda da, biz olarǵa jaqyn boldyq, zombı týraly qorqynyshty fılmdegideı kózderi qyzaryp ketken. Olar: «ákimdikke baraıyq» dep aıqaılaı bastady. Artynsha bul top túgeldeı ákimdikke qaraı bet aldy. Soqqyǵa ushyraǵan, fızıkalyq zorlyq-zombylyq kórgen, kıimderi jyrtylǵan polıtsııa qyzmetkerlerin kórdik. Sherýshiler olardyń shlemderin, saýyttary men qalqandaryn alyp alǵan. Olar barlyq kólikti, sonyń ishinde jedel járdemdi de toqtatyp, ishinde polıtsııa qyzmetkerleri bar-joǵyn tekserdi. Tipti, júksalǵyshty ashýǵa májbúr etti. Biz polıtsııa qyzmetkerlerin ol jerden qalaı da alyp ketý kerek dep sheshtik», – dep eske aldy polıtseı.

Onyń aıtýynsha, keshki ýaqytta jedel ýákil lańkesterdiń qarýdy basyp almaýy úshin Polıtsııa departamentiniń ǵımarattaryn qorǵaýǵa májbúr boldy.

«Aınalmaly joldarmen Polıtsııa departamentine áreń jettik. Bizge nusqaý berildi. Biz jaryq-shýly granatalardy laqtyryp, eskertý jasaı bastadyq. Biraq, bul adamdar eshteńege jaýap bermedi, olardy eshteńe qorqytpady. Oq jaraqatyn alǵan adam ornynan turyp, departamentke qaraı júrýin jalǵastyrdy. Eki adam kelip, jaralylardy kóterip, alyp ketti. Taǵy bireýi avtomatyn alyp, bizge qaraı oq atty. Kóliktermen joǵary jyldamdyqpen ótip bara jatyp, oq jaýdyrdy»,- dedi maıor.

Spıkerdiń aıtýynsha, kúres barysynda áskerılerden tartyp alynǵan KamAZ kóligin júrgizgen shabýyldaýshy joıyldy. Aýyr tehnıkanyń kómegimen polıtsııaǵa shabýyl jasaý áreketi birneshe ret qaıtalandy.

«Biz KamAZ-dyń qaıta ot alǵanyn estidik. Bireý taǵy da bizdiń qaqpamyzdy buzbaq boldy. Olar bizdiń ǵımaratqa «Molotov kokteılderin» qaıta-qaıta laqtyrdy. Departamenttiń aldynda úlken aǵash ósip tur. Molotov kokteılderiniń biri aǵashtyń butaqtaryna ilinip, ǵımaratqa jetpeı qaldy. Adamdar agressıvti boldy, tolyq qarýlanǵan, bul beıbit sherý emes ekeni birden túsinikti boldy. Osy lańkesterdiń shabýylyna toıtarys bere alǵan polıtsııa qyzmetkeri bolǵanyma qýandym. Abyroı bolǵanda, men áriptesterimmen birge shabýylǵa toıtarys berip, aman qaldym»,- dep túıindedi polıtsııa qyzmetkeri.