Almatyda 5 dárihanada baǵa zańsyz kóterilgen
ALMATY. QazAqparat - Almatyda 5 dárihana uıymynda dári quny zańsyz kóterilgen. Bul týraly qalalyq Taýarlar men qyzmetterdiń sapasy men qaýipsizdigin baqylaý departamentiniń basshysy Aızat Moldaqasymova onlaın brıfıng barysynda málim etti, dep habarlaıdy QazAqparat tilshisi.
Onyń aıtýynsha, Almaty boıynsha TJ jaǵdaıynda áleýmettik mańyzy joǵary 103 dárilik zattyń ataýy tizimdelgen.
«Bul dárilerdiń baǵasyn kótermeý jaıly qalalyq ákimdik pen Taýarlar men qyzmetterdiń sapasy men qaýipsizdigin baqylaý departamenti, Farmatsevtıkalyq qyzmetti qoldaý men damytý qaýymdastyǵynyń arasynda memorandýmǵa qol qoıylǵan. Almaty ákimdigi men departament qyzmetkerleri qalanyń 8 aýdanynda kúndelikti baǵalarǵa monıtorıng júrgizedi», - dep atap ótti Departament basshysy.
Tekserý nátıjesinde 135 dárihana uıymy ishinde 5 dárihanada dári baǵasyn negizsiz kóterilgeni anyqtaldy.
«5 dárihanada dári baǵasy negizsiz qymbattaǵan. Bul memorandým men birqatar zańnamany buzý bolyp tabylady. Dárihana uıymy basshysyna hattama toltyrylyp, ákimshilik sotqa joldandy. Olarǵa 97 myń men 235 myń teńge aralyǵynda aıyppul qarastyrylǵan», - dedi Aızat Moldaqasymova.
