Almatyda 49 jastaǵy áıel men onyń úsh balasy 20 jyl qujatsyz júrgen
ALMATY. QazAqparat - 49 jastaǵy almatylyq áıel jáne onyń úsh balasy alǵash ret Qazaqstan azamattarynyń jeke basyn kýálandyratyn qujattardy aldy, dep habarlaıdy QazAqparat tilshisi.
Olga Denısovanyń 1974 jylǵy úlgidegi (KSRO) tólqujatyn 20 jyl buryn joǵaltqany anyqtaldy. Qıyn jaǵdaıdy sheshý úshin áıel Memleket basshysyna júgindi.
«Olga Denısova 1972 jyly týǵan, 20 jyldan astam ýaqyt boıy Qazaqstan Respýblıkasynyń aýmaǵynda jeke basyn kýálandyratyn qujattarsyz ómir súrgen.Onyń 1996 jylǵy, 1999 jylǵy jáne 2002 jyly týǵan úsh balasynyń da jeke basyn kýálandyratyn eshqandaı qujattary bolmaǵan. QR zańnamasynda kózdelgen mindetti rásimder oryndalǵannan keıin, bizdiń bólimniń qorytyndysymen O.S.Denısova jáne onyń balalary 20.12.1991 jylǵy No1017-X11 «Qazaqstan Respýblıkasynyń azamattyǵy týraly» Zańynyń 3-tarmaǵyna sáıkes, Qazaqstan Respýblıkasynyń azamattary dep tanyldy. Sáıkesinshe, olarǵa Qazaqstan Respýblıkasy azamatynyń jeke kýálikteri berildi», – dedi Almaty qalalyq PD Kóshi-qon qyzmeti basqarmasynyń bastyǵy Ashat Býtýnchınov.
Olga Denısovanyń qyzy óz kezeginde otbasy úshin mańyzdy máseleni sheshkeni úshin rızashylyǵyn bildirdi.
«Biz elimizdiń Prezıdentinen kómek suradyq, sodan keıin olar bizge shuǵyl kómektesti, qujattardy jasady, bul úshin men QR Prezıdentine, Almaty qalasynyń kóshi-qon qyzmetine rahmet aıtamyn, – deıdi Aleksandra Denısova.
