Almatyda 478 oqýshy «Altyn belgi» aldy
ALMATY. QazAqparat - Almatyda mektep bitirýshilerdiń «Jas túlek-2019» festıvali ótti, dep habarlaıdy QazAqparat tilshisi.
Saltanatty sharaǵa qatysqan qala ákimi Baýyrjan Baıbek túlekterge mektep bitirý attestaty men «Altyn belgilerdi» tabystady.
Bıyl Almatyda 8250 oqýshy mektep bitirse, onyń 478-i «Altyn belgige» ıe boldy.
«Sizderdiń bilimge degen qushtarlyqtaryńyz ben tabandylyqtaryńyz «Altyn belgimen» marapattaldy. Aralaryńyzda respýblıkalyq jáne halyqaralyq olımpıadalardyń jeńimpazdary, shyǵarmashylyq baıqaýlar men zııatkerlik oıyndardyń júldegerleri bar. Sizder táýelsiz Qazaqstannyń bolashaǵysyzdar. Barlyq ata-analar men ustazdarǵa alǵysymdy bildiremin», - dedi Baýyrjan Baıbek.
Túlekterdi jasampaz jastar Erjan Maksım, Danelııa Tóleshova, Jan Makın quttyqtap, án arnady.
Aıta ketý kerek, sońǵy 5 jylda Almatyda bilim salasyn qarjylandyrý 2 ese artty. Qaladaǵy barlyq mektepter fızıka, hımııa, bıologııa kabınetterimen jabdyqtalǵan.
78 oqý ornynda seısmokúsheıtý jumystary júrgizildi. Sońǵy úsh jylda 3 myń oryndyq 3 jańa mektep boı kóterdi. Alty mektepke japsarlastyryp qosymsha ǵımarattar salyndy.
Kúzde Alataý aýdanynda 600 balaǵa shaqtalǵan taǵy bir mektep ashylady.
