Almatyda 45 503 adam revaktsınatsııalandy

ALMATY. QazAqparat - Almatyda koronavırýsqa qarsy vaktsınanyń 585 700 dozasy bar. Bul týraly qalalyq Qoǵamdyq densaýlyq basqarmasynyń basshysy Narıman Tabynbaev málim etti, dep habarlaıdy QazAqparat tilshisi.

«Búginde Almatyda 585 700 doza vaktsına bar, onyń ishinde «Spýtnık-V» – 33 756, «QazVac» – 50 009, «Vero Cell» – 223 755 jáne «Pfizer» - 277 987 vaktsınalary»,- dedi ol.

Narıman Tabynbaev revaktsınatsııany 45 503 almatylyq alǵanyn aıtty.

«Vaktsınalaný óziniń tıimdiligin kórsetti. Revaktsınatsııa jónindegi naýqandy jalǵastyrý qajet. Búginde aqyly vaktsınatsııaǵa arnalǵan «Pfizer» preparaty joq, men turǵyndardy qolda bar «QazVac» jáne «Vero Cell» vaktsınalarymen qaıta vaktsınalanýǵa shaqyramyn, olar tıimdilikten esh kem túspeıdi», – dep atap ótti basqarma basshysy Narıman Tabynbaev