Almatyda 44 jastaǵy ana 14-inshi balasyn dúnıege ákeldi

ALMATY. QazAqparat - Almaty qalasynyń 44 jastaǵy turǵyny 14 balanyń anasy atandy. Bul týraly Qoǵamdyq densaýlyq basqarmasynyń baspasóz qyzmetinen málim etti, dep habarlaıdy QazAqparat tilshisi.

Kópbalaly ana sábıin Almaty qalalyq Perınataldy ortalyǵynda bosandy. 7 ul men 7 qyzdyń anasy dárigerlerge alǵysyn bildirdi.

«Qudaıdyń bergenin qýana qabyldaımyz, árıne. Sondyqtan, úlken otbasy bolyp otyrmyz. Qazir tuńǵyshymnyń ózi áke atanýǵa daıyndalyp júr. Ne bolsa da, bastysy basymyz aman bolsyn» — dedi qala turǵyny Elena Borodıýk.

Batyr anany bosandyryp alǵan dárigerlerdiń aıtýynsha, náresteniń boıy 55 sm, salmaǵy 4 keliden astam. Qazir ananyń da, balanyń da densaýlyǵy birqalypty.

«Joǵarǵy toptaǵy qaýip-qaterdegi qan ketý bolǵandyqtan, búkil ujym bolyp atsalysyp, áıel on tórtinshi balasyn aman-esen bosandy. Salmaǵy 4 keliden asatyn qyz bala dúnıege keldi» — dedi Almaty qalalyq Perınataldyq ortalyǵy bas dárigeriniń orynbasary Jámılıa Isaeva.