Almatyda 43 shaqyrym jańa jol salynady
ALMATY. QazAqparat – Almaty ákimi Baqytjan Saǵyntaev megapolıstiń kóshe-jol júıesin damytý jáne aldaǵy kezeńde atqarylatyn jol-qurylys jumystarynyń josparlary boıynsha keńes ótkizdi. Bıyl qalaǵa qosylǵan aýmaqtarda, Jańa Almatynyń shaǵyn aýdandarynda jańa joldardy salý jalǵasady, dep habarlaıdy QazAqparat tilshisi.
Bıyl 76 shaqyrym joldyń qurylysy bastalady, onyń 43 shaqyrymyn jyl sońyna deıin aıaqtaý josparda. Qalǵan 33-i «Álmerek» jáne «Qaırat» yqshamaýdandaryndaǵy sýmen jabdyqtaý jáne sýdan burý jónindegi ınjenerlik jelilerdiń qurylysy aıaqtalǵan soń júzege asady.
Jol qurylysy Alataý aýdanyndaǵy «Ójet», «Samǵaý», «Shańyraq-5»; Naýryzbaı aýdanyndaǵy «Quramys»; Túrksib aýdanyndaǵy «Álmerek», «Nurshashqan», «Qaırat» shaǵyn aýdandardan bastalady. Atalǵan aýdardarda 54 myńǵa jýyq adam turady.
Mysaly, «Samǵaý» yqshamaýdanynda jalpy uzyndyǵy 23 shaqyrym jol bar, onyń 18,4 shaqyrymy asfalttalǵan. 25 kóshedegi qalǵan 4,6 shaqyrymynda jol tósemi joq, munda jańa joldar salynatyn bolady.
«Shańyraq-5» yqshamaýdanyndaǵy 29 kóshege 6,6 shaqyrym jańa jol salynady. «Ójet» yqshamaýdanynda - 87 kóshege 11,2 shaqyrym; «Quramys» yqshamaýdanynda - 27 kóshege 4,9 shaqyrym; «Álmerek» yqshamaýdanynda - 46 kóshege 14,6 shaqyrym jol salynatyn bolady. «Nurshashqanda» 25 kóshege 4,9 shaqyrym, «Qaırat» yqshamaýdanyndaǵy 20 kóshege 4,9 shaqyrym jańa joldar salynady.
2020 jyly sýmen qamtý jáne sýdan burý boıynsha ınjenerlik jeliler tartylǵan «Dýman» yqshamaýdanynyń joldaryna júrgizilgen kúrdeli jóndeý jumystary jalǵasady. Aǵymdaǵy jyly 59 kóshedegi 26,8 shaqyrym jol kúrdeli jóndeledi. Ótken jyly 6 kóshedegi uzyndyǵy 3,7 shaqyrym bolatyn joldarǵa kúrdeli jóndeý júrgizilgen bolatyn.
Sondaı-aq bıyl uzyndyǵy 183 shaqyrym bolatyn 190 kósheni ortasha jóndeýden ótkizý josparda, onyń tórtten bir bóligi Alataý aýdanyna tıesili.
Almaty ákimi B. Saǵyntaev jol-qurylys jáne jóndeý jumystarynyń sapasyn baqylaýdy, belgilengen merzimderdi saqtaýdy tapsyrdy. Ótken jyldaǵydaı, bıyl da Jańa Almaty aýdandaryna jańa joldar salýǵa basymdyq beriledi.
Búgingi kúni megapolıstegi jaqsy jáne qanaǵattanarlyq jaǵdaıdaǵy joldardyń úlesi 80%-dy quraıdy. Jyl aıaǵynda bul kórsetkish 83%-ǵa jetetin bolady.
