Almatyda 424 túlek «Altyn belgige» úmitker

ALMATY. QazAqparat – Bıyl Almatyda 424 túlek «Altyn belgi» alýy múmkin, dep habarlaıdy QazAqparat tilshisi.

Almaty qalalyq bilim basqarmasynyń málimetinshe, búgin qalanyń 313 mektebinde sońǵy qońyraý soǵylyp, 14 myńnan astam túlek mektepti bitirdi. Onyń ishinde 424 oqýshy «Altyn belgiden» úmitti. 975 oqýshy úzdik attestatqa qol jetkizbek.

9, 11-synyp oqýshylarynyń qorytyndy memlekettik emtıhandary bekitilgen kestege sáıkes ótkiziledi: 9-synyptarda 2-13 maýsym aralyǵynda, 11-synyptarda 5-19 maýsym aralyǵynda. 11-synyp oqýshylary Qazaqstan tarıhy boıynsha emtıhandy aýyzsha tapsyrady.
Eske salsaq, UBT jylyna 4 ret (qańtar-aqpan, naýryz, mamyr-shilde, tamyz) ótkiziledi. Talapkerlerge Ulttyq biryńǵaı testileý tapsyrýǵa jáne grantqa túsýge eki múmkindik beriledi. Eki múmkindikte de beıindik pánderdiń bir ǵana kombınatsııasyn tańdaýǵa bolady.
Ulttyq biryńǵaı testileý ál-Farabı atyndaǵy QazUÝ-da 18 mamyrdan bastalyp, 5 shildede aıaqtalady.

«Bıyl 5 maýsym men 30 tamyz aralyǵynda oqýshylarǵa qosymsha bilim berý uıymdastyrylady. Bilim sapasyn arttyrý maqsatynda sektsııalar, klýbtar, úıirmeler, eńbek toptary, ekskýrsııalar jáne taǵy basqa sharalar qarastyrylǵan»,- dep habarlady qalalyq ákimdikten.