Almatyda 424 shaqyrym aryq jelisin qaıta qalpyna keltirý qajet
ALMATY. QazAqparat – Almaty ákimi Baqytjan Saǵyntaev tóraǵalyq etken apparattyq keńeste aryq jelilerin túgendeý nátıjeleri qaraldy, onyń qorytyndysy boıynsha aryqtardy abattandyrý jáne jańbyr sýlaryn aǵyzý boıynsha keshendi sharalar qabyldanatyn bolady.
Aryq jelilerin túgendeý jumystary qala basshysynyń tapsyrmasy boıynsha jaǵdaıdyń ózektiligi, burynnan bar aryq júıesi men jaýyn kárizderiniń karta-syzbasyn ázirleý maqsatynda júrgizildi. Sondaı-aq, jasyl jelekterdi sýmen qamtamasyz etýdiń jáne jańbyr sýlaryn aǵyzýdyń keshendi sharalaryn daıyndaý mindeti qoıyldy.
Túgendeý nátıjesinde 1523 shaqyrymdy quraıtyn sýarmaly aryqtyń jalpy uzyndyǵy belgilendi. Sonyń ishinde aýdandyq ákimdikter enshisinde - 1138 shaqyrym, aýla aýmaǵynda - 245 shaqyrym, saıabaq aımaqtarynda - 60 shaqyrym. Sondaı-aq, 424 shaqyrym aryq jelisi qaıta qalpyna keltirý jumystaryn qajet etedi. Sýarý úshin 168 shaqyrym aryq qoldanylady.
Nysandardyń tólqujattary boıynsha geoderekter bazasy jasaldy, túgendeý kartalarynyń kesheni, sondaı-aq aryq jelileri me jańbyr kárizderin abattandyrý boıynsha usynymdar ázirlendi.
