Almatyda 4109 adam JITS ortalyǵynyń esebinde tur
ALMATY. QazAqparat - Almatyda 4109 adam JITS ortalyǵynyń esebinde tur. Bul týraly óńirlik kommýnıkatsııalar qyzmetindegi brıfıngide Almatydaǵy JITS-tiń aldyn alý jáne oǵan qarsy kúres ortalyǵy bas dárigeriniń orynbasary Alfııa Denebaeva aıtty, dep habarlaıdy QazAqparat tilshisi.
Spıkerdiń sózinshe, sońǵy jyldary megapolıste AITV-nyń jynystyq jolmen berilý jaǵdaılarynyń 2013 jylǵy 63% - dan 2022 jyly 77,9% - ǵa deıin kóbeıgeni baıqalǵan. Inektsııalyq esirtki qoldaný arqyly berilý 15% -ǵa jetken.
«AITV-ny emdeý dıagnoz qoıylǵannan keıin birden bastalady jáne ol tegin júrgiziledi. 2022 jylǵy 1 qazanyndaǵy jaǵdaı boıynsha JITS ortalyǵynda dıspanserlik esepke 4109 adam tirgelgen, jyl saıynǵy ósim 10-11 paıyz. Anyqtalǵan jaǵdaılardyń tórtten bir bóligi elimizdiń basqa aımaqtarynan kelgen azamattar. Antıretrovırýstyq terapııany 3688 AITV men ómir súretin adam qabyldaıdy (AÓA) (bul esepte turǵandardyń 91,2% jáne AÓA boljamdy sanynyń sanynyń 83%), ART tıimdiligi - 86% quraıdy», - dedi Alfııa Denebaeva.
Aıtýynsha, mańyzdy baǵdarlamalyq áreketterdiń biri AITV-nyń anadan balaǵa berilýiniń aldyn alý. AITV-ǵa oń nátıje kórsetken júkti áıeldiń profılaktıkalyq em qabyldaýy ómirge deni saý bala ákelýin qamtamasyz etedi.
«Júkti áıelderdi «áıelder keńesinde» AITV-ǵa eki ret josparly tekserýden ótkizedi, bul aldyn alý is-sharalaryn ýaqtyly bastaýǵa múmkindik beredi. 2020 jyldan bastap júkti áıelderdiń jynystyq serikteri de AITV-ǵa testileýden ótýde»,- dedi spıker.
Sondaı-aq epıdemııamen kúresý jáne ınfektsııanyń jańa jaǵdaılaryn azaıtý úshin halyqtyń juqtyrý qaýpi joǵary toptaryna kóp kóńil bólinýde.
«Inektsııalyq esirtki qoldanýshylar arasynda parenteraldi berilýdiń aldyn alýdyń tıimdi sharalarynyń biri «zııandylyqty azaıtý» baǵdarlamasy bolyp tabylady. Zııandylyqty azaıtý - bul esirtki qoldanýdyń jaǵymsyz saldaryn azaıtýǵa baǵyttalǵan, ıaǵnı AITV, týberkýlez, vırýstyq gepatıt sııaqty aýrýlardyń berilýin azaıtýdyń keshendi sharalary. Osy baǵdarlamany iske asyrý aıasynda qalalyq emhanalarda 19 senim pýnkti men 5 dostyq kabınetteri jumys isteıdi», - dedi Alfııa Denebaeva.
