Almatyda 41 jańa ekologııalyq avtobýs jolǵa shyqty
ALMATY. QazAqparata - Gazben júretin jańa avtobýstar megapolıstiń qoǵamdyq kólik parkin tolyqtyrdy, dep habarlaıdy QazAqparat tilshisi.
Almaty ákimi Baqytjan Saǵyntaev Instagram paraqshasynda kommýnaldyq jáne qoǵamdyq kólikterdi júıeli jańartý jáne ekologııalyq taza otynǵa kóshirý qalanyń ekologııasyn jaqsartý jáne jolaýshylar tasymaly sapasyn arttyrý maqsatynda júzege asyrylatynyn aıtty.
«Jolaýshy tasymaly salasy aıtarlyqtaı jańǵyrtyldy. Búgin ekologııalyq taza otynmen júretin 41 jańa avtobýs jolǵa shyqty. №45, 70 sııaqty baǵyttarda qatynaıtyn avtobýs parkin jańartamyz», - dep jazdy B. Saǵyntaev.
Syıymdylyǵy 90 adamǵa arnalǵan úsh esikti 12 metrlik jańa avtobýstarda múmkindigi shekteýli azamattarǵa arnalǵan jyljymaly platforma bar.
Avtobýstar beınebaqylaý, jolaýshy aǵynyn esepteıtin avtomatty júıe jáne júrgizýshiniń jaǵdaıyn baqylaıtyn datchıkpen jabdyqtalǵan.
«Almatyelektrotrans» kommýnaldyq avtoparki barlyǵy 150 avtobýsty jetkizýge kelisimshart jasady. Qalǵan 109-y jaqyn arada jetkiziledi. Sondaı-aq jeke tasymaldaýshylar 83 avtobýs,sonyń ishinde 38 elektrobýs satyp alýdy josparda. Osylaısha, bıyl jolaýshylar tasymaly parki 233 ekologııalyq taza kólikpen jańartylady.
Jalpy qalada 20 avtobýs parki jumys isteıdi.
Onda 147 baǵyt boıynsha qatynaıtyn 1940 birlik avtobýs bar. Onyń 393-i gazben, 14 toqpen, 1000-astamy dızel otynymen júredi.
Sondaı-aq,160 trolleıbýs qatynaıdy.
