Almatyda 400 adam maska taqpaǵany úshin 83 myń teńge aıyppul tóleıtin boldy
ALMATY. QazAqparat - Almatyda 400 adam maska taqpaǵany úshin 83 myń teńge kóleminde aıyppul tóleıtin boldy. Bul týraly Almaty ákimi Baqytjan Saǵyntaev tikeleı efır barysynda aıtty, dep habarlaıdy QazAqparat tilshisi.
Qalada qazir qoǵamdyq oryndarda, aıaldamalarda, podezder men dúkenderde maska taǵý týraly aqparattar japsyrylǵan.
«Biraq, keıbir azamattar maskany taqpaı, qaltasyna salyp júredi. Yńǵaısyz ekeni ras. Biraq, biz bul ádetke úırenýimiz kerek. Óz densaýlyǵymyz úshin. Búginde Almatyda 400 adam 83 myń teńge aıyppul tóleıtin boldy. Eger aıyppuldy ýaqytynda tólese, bul somanyń jartysyn ǵana tóleıdi», - dedi ákim.
Munyń aldynda qalanyń bas sanıtarlyq dárigeri Jandarbek Bekshın de 1 aptanyń ishinde tólegen adamǵa aıyppul eki ese qysqaratynyn aıtqan bolatyn.
