Almatyda 40 myńnan astam abonent gazben úzdiksiz qamtamasyz etiledi
Almaty ákimi jumys sapary barysynda Dýlatı kóshesi boıyndaǵy uzyndyǵy 8,8 shaqyrymdyq káriz kollektory ýchaskesiniń qurylysyn qarap shyqty
Megapolıs basshysy qalanyń Energetıka jáne kommýnaldyq sharýashylyq basqarmasyna jumys qarqynyn jedeldetýdi tapsyrdy.
«Barlyq obektiler merziminde berilýi jáne keshendi túrde abattandyrylýy tıis», - dep atap ótti Baýyrjan Baıbek.
Ótken jumys saparynyń qorytyndysy boıynsha Altynsarın kóshesi boıyna uzyndyǵy 2,8 shaqyrymdyq gaz qubyryn tartý jumysy oıdaǵydaı aıaqtaldy. Osynyń arqasynda 40 myńnan astam abonent gazben úzdiksiz qamtamasyz etiledi.
Jambyl kóshesi boıymen Nazarbaev dańǵyly jáne Pýshkın kóshesiniń arasynda jylý jelilerin qaıta jasaý jumystary merziminen buryn aıaqtaldy, qazir munda mańaıdy abattandyrý isi jalǵasýda.
Sondaı-aq, qalanyń birqatar ýchaskelerinde jumystar júrýde. Olar shildeniń sońyna taman aıaqtalady. Jumysy qomaqty ári kúrdeli ýchaskeler tamyz aıynyń sońynda iske qosylady. Mundaǵy barlyq abonentter ýaqytsha syzba arqyly ystyq sýmen úzdiksiz qamtamasyz etiledi.
Sýmen qamtýdyń jáne sýdan bólýdiń jańa jelilerin salý jumystary jalǵasýda. Osynyń arqasynda qalanyń 5 aýdanynyń 120 myńnan astam turǵyny sapaly sýmen jáne ortalyqtandyrylǵan kárizben qamtamasyz etiledi.
Jumys sapary kezinde Almaty ákimi qalanyń tarıhı ortalyǵyn qaıta jańǵyrtý jumysyn tekserdi. Qazirgi kezde Abaı, Abylaı han, Nazarbaev dańǵyldary men Abaı alańynyń ýchaskelerinde ınjenerlik jelilerdi aýystyrý, tas tóseý, sýarý júıesin ornatý, nysannyń syrtyn jańartý jumystary júrýde.
Aıta keteıik, osy jazda Almatyda uzyndyǵy 160 km bolatyn 150-den astam kóshe jóndeledi. Barlyq jer asty ótpeli joldarǵa kúrdeli jóndeý jumystary júrgizilýde. Ótken jyly qalada 500 aýla jóndelse, bıyl qalanyń barlyq aýdandarynda taǵy da 600-den astam aýla retke keltiriledi. Rekonstrýktsııa barysynda jaıaý júrginshiler jolyn, jasyl jelek aımaqtaryn keńeıtý, jańa fontandar salý qarastyrylǵan.
Sondaı-aq, megapolıste sońǵy jyldary 800 km ınjenerlik júıeler salyndy jáne jóndeldi. Sonyń 313 km - sý qubyry, 266 km - káriz qubyry, 150 km - elektr berý jelisi jáne 32,3 km - jylý jelisi.
