Almatyda 4 jasar «hrýstal» qyzǵa biregeı ota jasaldy
ALMATY. QazAqparat - Almaty dárigerleri sırek kezdesetin aýyr dertpen týǵan búldirshinge birneshe kúrdeli ota jasady, dep habarlaıdy QazAqparat tilshisi.
№2 qalalyq klınıkalyq aýrýhananyń travmatolog-ortoped mamandary maıtabannyń týabitti aýyr túrimen jáne jetilmegen osteogenez (súıekteri mort synady) dertimen qatar aýyratyn 4 jastaǵy kishkentaı qyzǵa operatsııa jasady.
Bir saǵattan astam ýaqytqa sozylǵan ota Ponsetı Orys qaýymdastyǵy prezıdenti Maksım Vavılovtyń qatysýymen ótken biregeı sheberlik klasy barysynda jasaldy.
Aýrýhana baspasóz qyzmetiniń dereginshe, týabitti aqaýdy túzetý maqsatynda patsıentke sińir aýystyrý, ahıloplastıka, aýtotransplantant ornatý syndy birneshe hırýrgııalyq manıpýlıatsııa jasaldy. Kúrdeli operatsııalar mindetti áleýmettik medıtsınalyq saqtandyrý esebinen jasaldy.
Travmatologııa bólimshesiniń meńgerýshisi Erlan Sadyrbalınniń aıtýynsha, súıekteri mort synatyn bolǵandyqtan uzaq ýaqyt boıy ota jasaýǵa múmkindik bolmady. Osy ýaqytqa deıin ol elordadaǵy «Ana men bala» ǵylymı-zertteý ınstıtýtynyń almastyratyn terapııasymen shektelip kelgen.
«Bala ishten osyndaı dertpen týǵan. Ýaqyt óte kele tabandary aýyryp, pishini ózgergen. Bala bolyp júgirip, sekirmek túgil, aıaǵy basqanda da aýyratyn. Biz kópke deıin oǵan operatsııa jasaı almadyq. Eger jasasaq súıekter shydamaı, synyp ketetin edi. Sol sebepti balanyń súıegi qatqansha, ıaǵnı 4 jasqa deıin kúttik. Valgýsty maıtabanǵa ota jasaldy, endi ol joǵaryda aıtylǵan shaǵymdardyń bir bóliginen arylýy tıis», - deıdi Erlan Sadyrbalın.
Kishkentaı patsıent aýrýhanadan shyqty. Aldaǵy ýaqytta ol medıtsınalyq ońaltýdan ótedi.
