Almatyda 4 jasar bala joǵaldy
ALMATY. QazAqparat- Almatyda 4 jastaǵy búldirshin iz-tússiz joǵalyp ketti. Bul týraly qalalyq ІІD baspasóz qyzmeti málimdeme jasady, dep habarlaıdy QazAqparat tilshisi.
«2014 jyly týǵan Ársen Kómekov 17-mamyr kúni Alataý aýdany Shańyraq yqsham aýdanynda joǵalǵan. Tús aýa úı qaqpasynyń syrtynda úlkenderdiń qaraýynsyz oınap júrgen bala belgisiz baǵytta joǵalyp ketken»-dedi ІІD baspasóz qyzmetinen.
«Balanyń týystary ózderi izdep taba almaǵan soń, polıtsııaǵa túngi 10-nyń kezinde balanyń joǵalǵany týraly habarlaǵan. Kóp kidirmeı krımınaldyq polıtsııa qyzmetkerleri, jergilikti ınspektorlar, jol-patrýldik polıtsııasy, úıretilgen ıtterimen kınologtar, Ulttyq gvardııanyń áskerı qyzmetkerlerinen jedel izdestirý toby quryldy. Bastapqyda komanda quramynda 23 adam bolsa, qazir olardyń sany 34-ke jetti. Balany izdeýge barlyǵy 100 polıtsııa qyzmetkeri jumyldyryldy»,-dedi qalalyq ІІD resmı ókili polıtsııa podpolkovnıgi Saltanat Ázirbek.
Onyń aıtýynsha, birinshi kezekte káriz lıýkteri men qudyqtar, kanaldar men aryqtar, toǵaıly jerler men ózender, bos turǵan úıler men shatyrlar sııaqty bala úshin qaýipti nysandar tekserildi. Qazirge deıin 26 600 úı tekserilip, 18 myń adamnan málimet surastyryldy. Bir kelinshek oqıǵa bolǵan kúni keshki saǵat 8-00-der shamasynda dúkende bir balanyń jylap turǵanyn, biraq asa nazar aýdarmaǵannyn aıtqan.
Sonymen qatar, jedel qyzmet bóliminiń mamandary Shańyraq yqsham aýdanynda ornalasqan beınejazbalardy tekserýde. Joǵalǵan bala týraly málimetter qala syrtyndaǵy aýdandar men oblystardaǵy polıtsııa bólimshelerine jiberilgen.
Polıtsııaǵa kelip túsken aqparat boıynsha, joǵalǵan balanyń ústinde keýdesinde qyzyl jolaǵy bar qara fýtbolka, kókshil qara shalbar, aıaǵynda qara tústi krossovka bolǵan. Balanyń boıy 100 sm shamasynda, erekshe belgileri joq.
«Balany kórgen-bilgen azamattar bolsa, tez arada 227-55-00; 227-55-01; 227-55-02; 8-701-523-17-07 nemese102 nómirine habarlasýyn suraımyz» -dedi Saltanat Ázirbek.
Foto: QR ІІD basposóz qyzmeti
