Almatyda 4 sporttan oqýshylar kúsh synasty
ASTANA. QazAqparat Almatyda 5-8 synyp oqýshylary arasynda «Sporttyq Almaty» baǵdarlamasy aıasynda sporttyń tórt túrinen fınaldyq jarys ótti, dep habarlaıdy QazAqparat.
№ 131 mektep-lıtseıinde qalanyń ár aýdanynan kelgen 250 jýyq úzdik oqýshylar asyq atý, shaǵyn fýtbol, arqan tartý, basketboldan ózara myqtyny anyqtady.
Sonymen qatar, kelgen qonaqtar men qatysýshylar úshin kontsert qoıyldy. Oqýshylarmen qatar, «Skillerz crew» frıstaıl toby men hımııalyq kreo-shoý ujymdary óner kórsetti.
«Búgin bizdiń mektepte qalanyń eń úzdik komandalary jınaldy. Bul sporttyq sharanyń bizdiń bilim ordamyzda ótip jatqanyna óte qýanyshtymyn», - dedi №131 mektep-lıtseıiniń dırektory Roza Dostanova bólisti.
Jalpykomandalyq esep boıynsha Medeý aýdanynyń oqýshylary birinshi oryndy ıelense, ekinshi orynǵa Bostandyq aýdanynyń komandasy jaıǵasty. Al úzdik úshtikti Túrksib aýdanynyń jetkinshekteri túıindedi. Jeńimpazdar men júldegerler medal, dıplom jáne kýboktarǵa ıe boldy.
«Barlyq kezeńderden óttim. Asyq atý bizdiń ulttyq oıynymyz bolǵandyqtan tańdaýym osy sport túrine tústi. Biz dostarymyzben aýlada jıi oınap turamyz, mende 250-ge jýyq asyq bar», - dedi №156 mektep oqýshysy Tilegen Nurmuhamet.
Aıta keter jaıt, bul oqýshylar arasyndaǵy sporttyq jarystar aqpan aıynda bastalyp, balalar jáne jasóspirimderdiń sportqa degen qyzyýshylyǵyn arttyryp, salaýatty ómir saltyn ustanýǵa beıimdeý maqsatynda ótkizildi.
