Almatyda «4-shi Toqyma kongresi» ótti
ALMATY. Qarashanyń 5-i. QazAqparat /Nazıra Eleýhan/ - Búgin Almatyda QR Indýstrııa jáne saýda mınıstrliginiń uıymdastyrýymen «4-shi Toqyma kongresi» ótti,
dep habarlaıdy QazAqparat.
Toqyma kongresi toqyma óndirisiniń damýyn yntalandyrý, memlekettik organdar men toqyma óndirisimen aınalysatyn jeke sektordyń arasynda dıalogty qamtamasyz etý, problemalyq máselelerdi belgileý, ońdy álemdik tájirıbeni zertteý jáne qoldaný arqyly Qazaqstannyń toqyma óndirisin damytýda jańa joldardy tabý maqsatynda ótkizildi.
«Kongreste elimizdiń jeńil ónerkásip salasyn damytý, ınvestıtsııa salý joldary, bul salanyń búgingi jaǵdaıy men bolashaqtaǵy perspektıvalary, toqyma óndirisiniń róli men mańyzy, osy salanyń zańdyq turǵyda rettelýi, salyqtyq jáne kedendik máseleleri, qazaqstandyq ekonomıkanyń shıkizattyq emes sektorynyń básekelestigin qamtamasyz etý jáne onyń álemdik sharýashylyq baılanystarǵa enýi jáne taǵy sol sııaqty basqa da osy saladaǵy máseleler talqylandy», dedi jeńil jáne aǵash óńdeý ónerkásibi basqarmasynyń basshysy Sáken Qabashev.
Kongreske qatysýshylardyń aıtýynsha, memlekettik qoldaý sharalary alynyp tastalǵannan keıin jeńil ónerkásip salasynyń jaǵdaıy 2,1 paıyzdan - 0,7 paıyzǵa deıin tómendegen. Osy jaǵdaıda bizdiń eldiń otandyq taýar óndirýshileri ishki naryqqa ónimdi az daıyndaýǵa kóshýge májbúr boldy. Qazirgi kúni jeńil ónerkásip salasynyń kásiporyndarynyń 70-80 paıyzy negizinen memlekettik, áskerı, ulttyq holdıngtermen áleýmetik nysandardyń tapsyrystarymen ǵana jumys isteýde. «2001-2003 jyldar aralyǵyndaǵy jeńildikterdiń arqasynda 174 kásiporyn qurylyp, negizgi kapıtal - 922,2 mıllıon teńgeni quraǵan bolatyn», deıdi olar.
