Almatyda 4 myńnan astam adam JITS ortalyǵynyń esebinde tur
Bul týraly óńirlik kommýnıkatsııalar qyzmetindegi brıfıngide Almatydaǵy JITS-tiń aldyn alý jáne oǵan qarsy kúres ortalyǵy bas dárigeriniń uıymdastyrý-ádistemelik jáne epıdemıologııalyq máseleler jónindegi orynbasary Alfııa Denebaeva aıtty, dep habarlaıdy QazAqparat tilshisi.
Spıkerdiń aıtýynsha, Almaty qalasy búginde Adamnyń ımmýn tapshylyǵy vırýsy (AITV) ınfektsııasynyń taralýy boıynsha respýblıkada altynshy orynda tur. Sondaı-aq, el boıynsha jáne Almaty qalasynda AITV-nyń jynystyq jolmen berilý jaǵdaıy kóbeıgen.
«AITV-nyń jynystyq jolmen berilý joly 2013 jylǵy 63%-dan 2022 jyly 78,6% - ǵa deıin ósken. Onyń ishinde Almatyda barlyq anyqtalǵan jaǵdaıdyń 16,8 paıyzy jynystyq «gomo» jolmen berilgen. Inektsııalyq esirtki qoldaný arqyly berilý 15%-dy quraıdy», - dedi dáriger.
Ol sondaı-aq ınfektsııanyń taralý joldary týraly aıtty.
«AITV úsh jolmen beriledi. Jynystyq qatynas, juqtyrǵan adamnyń qany arqyly, mysaly, tis şetkalaryn, qyryný jáne manıkıýr quraldaryn ortaq paıdalaný, tatýırovka jáne pırsıng jasatqanda kóktamyrishilik preparattardy qoldaný kezinde nemese juqtyrǵan anadan balaǵa, júktilik, bosaný jáne emizý kezinde. Joǵaryda atalǵandardan basqa AITV-nyń berilý joly joq. Sondyqtan AITV indetin juqtyrǵan adammen aralasýǵa, dos bolýǵa ábden bolady»,- dedi ol.
Alfııa Denebaeva AITV ınfektsııasy búginde emdeletin sozylmaly aýrýlar sanatyna jatatynyn atap ótti.
«Búgingi kúni indetti emdeý dıagnoz qoıylǵan soń birden bastalady jáne tegin kórsetiledi. AITV statýsyn arnaıy test tapsyrý arqyly ǵana bile alasyz. Ár adam turǵylyqty jeri boıynsha emhanada nemese JITS ortalyǵynda AITV-ǵa testten tegin óte alady»,- dedi ol.