Almatyda 4 myńǵa jýyq oqýshy bilim alatyn jańa mektepter ashyldy
ALMATY. QazAqparat – Almaty ákimi Baqytjan Saǵyntaev paıdalanýǵa beriletin jańa bilim nysandaryn aralap kórdi, dep habarlaıdy QazAqparat tilshisi.
Qala ákimi paıdalanýǵa beriletin M.Áýezov aýdanynyń «Mamyr» yqshamaýdanyndaǵy 1 200 oryndy jáne Túrksib aýdanynda ornalasqan «Nurshashqan» yqshamaýdanyndaǵy 600 oryndyq mektepti aralap kórdi.
Sondaı-aq, Baqytjan Saǵyntaev mektepter janynan salynǵan Bostandyq aýdanyndaǵy 300 oryndy, Alataý aýdanynyń «Qarasý» yqshamaýdanyndaǵy 192 oryndy, Medeý aýdanynyń «Dýman» yqshamaýdanyndaǵy 850 oryndy jańa qosalqy nysandardy aralap shyqty. Sonymen qatar, №5 mýzyka mektebiniń 350 oryndy jańa ǵımaratyna jáne jaqyn kúnderi ashylǵan kópbeıindi mýzyka ortalyǵyna bardy.
Mektepterdi aralap shyqqan B. Saǵyntaev bilim oshaqtarynyń aınalasyn abattandyrýǵa, jasyldandyrýǵa, kireberis joldar men trotýarlardy salýǵa jáne jóndeýge qatysty birqatar tapsyrma berdi.
Aıta keterligi, qala ákimi oqý oryndary dırektorlarynyń nazaryn kezekshi synyptarda sanıtarlyq-epıdemıologııalyq erejeni qatań saqtaý qajettigine aýdardy.
«Jańa oryndar mektepterge júkteme túsiretini belgili. Mysaly, búgingi kúni «Dýman» yqshamaýdanynda oqýshy ornynyń qajettiligi tolyǵymen sheshildi. Al, «Nurshashqanda» alǵash ret jańa mektep salyndy, ol Túrksib aýdanyndaǵy basqa mektepterge túsetin júktemeni azaıtady», - dedi B. Saǵyntaev.
