Almatyda 4 mektepke deıingi mekeme ashyldy

ALMATY. QazAqparat – Almatyda bıyl mektepke deıingi tórt mekeme ashyldy. Bul týraly Almaty qalasy Bilim basqarma basshysynyń orynbasary Aısulý Botaeva onlaın brıfıng barysynda aıtty, dep habarlaıdy QazAqparat tilshisi.

Memleket basshysy Qasym-Jomart Toqaevtyń 2020 jylǵy 1 qyrkúıektegi Qazaqstan halqyna arnalǵan Joldaýynda 2025 jylǵa deıin alty jasqa deıingi balalardy mektepke deıingi tárbıemen jáne oqytýmen qamtý 100% quraýy kerektigin aıtqan. Bul kórsetkishke qol jetkizý úshin Almaty qalasynda kóptegen jumys júrgizilýde.

Memlekettik-jekeshelik seriktestik aıasynda Almatyda 1751 orynǵa arnalǵan otyz bir jeke mektepke deıingi uıym bar. Memlekettik bilim berý tapsyrysy 20 441 oryndyq 397 jekemenshik balabaqshaǵa ornalastyrylǵan. 2020 jyly bir balaǵa memlekettik tapsyrys mólsheri 28 350 teńgeni, ata-ana tólemi 18 900 teńgeni quraıdy.

«Oryndardyń jetispeýshiligin azaıtý úshin 2020 jyly tórt memlekettik mektepke deıingi uıym ashyldy. Atap aıtar bolsaq Alataý aýdanynda 120 oryndyq bir balabaqsha, Almaly aýdanynda 120 oryndyq bir balabaqsha, Túrksib aýdanynda 280 oryndyq bir balabaqsha, Bostandyq aýdanynda «Bi group» AQ jeke ınvestoryn tartýymen 150 oryndyq balabaqsha ashyldy. 2021 jyly Bostandyq aýdanynda №21 mektep aýmaǵynda 120 oryndyq balabaqsha ashylady. 520 orynǵa arnalǵan taǵy úsh memlekettik balabaqshanyń qurylysy júrip jatyr», -dedi Aısulý Botaeva.