Almatyda 4 mamyrdan bastap ashylatyn bızneske qandaı talap qoıylady
ALMATY. QazAqparat – Almaty qalasy ákiminiń orynbasary Saparbek Tuıaqbaev onlaın brıfıng barysynda 4 mamyrdan bastap jumys isteýine ruqsat etiletin bızneske qandaı talaptar qoıylatynyn aıtty, dep habarlaıdy QazAqparat tilshisi.
QR Prezıdenti janyndaǵy TJ rejımin qamtamasyz etý jónindegi memlekettik komıssııa Almaty qalasynda kásiporyndardyń qyzmetin jalǵastyrýdyń úshinshi kezeńin iske qosýdy maquldaǵan bolatyn.
Osylaısha 4 mamyrdan bastap shashtarazdar (aldyn-ala jazylý boıynsha), fotosalondar men gúl dúńgirshekteri, jyljymaıtyn múlik kompanııalary, aıyrbastaý pýnktteri jumysyn qaıta bastaıdy.
Qyzmet kórsetý salasy boıynsha aıaq kıim jóndeý, hımııalyq tazalaý, baspa isi boıynsha nysandardyń jumysyn iske qosýǵa ruqsat etilgen.
Sondaı-aq, jumys kestesi saǵat 17:00-ge deıin, alańy 500 sharshy metrge deıin jeke turǵan azyq-túlik satpaıtyn (Saýda ortalyqtary, saýda oıyn saýyq ortalyǵy, saýda úıleri kirmeıdi) dúkenderdiń qyzmetine ruqsat berildi.
Osy kásiporyndar Almaty qalasynyń Bas memlekettik sanıtarlyq dárigeriniń «3-shi kezeńniń jekelegen salalarynyń nysandary qyzmetine shekteýlerdi alyp tastaý tártibi týraly» qaýlysynda jazylǵan sanıtarlyq-epıdemıologııalyq normalardy saqtaýǵa mindetteledi.
Olar algorıtmdi oryndaǵan jaǵdaıda ǵana qyzmetin jalǵastyrýǵa ruqsat etiledi.
«Algorıtm birneshe kezeńnen turady. Birinshiden, Almaty qalasy Bas memlekettik sanıtarlyq dárigeriniń «3-kezeńniń jekelegen salalarynyń nysandary qyzmetine shekteý qoıý tártibi týraly» qaýlysymen (budan ári - qaýly) tanysý kerek. Ekinshiden, qaýlynyń talaptaryna sáıkes nysandardy daıyndaýǵa tıisti. Úshinshiden, daıyndaý protsesi aıaqtalǵannan keıin - infoalmaty.kz saıtynda tirkelip, nysannyń qaýly talaptaryna sáıkes daıyndalǵanyn rastap, elektrondyq tsıfrlyq qoltańbamen habarlamaǵa qol qoıý arqyly kepildik beredi», - dedi Saparbek Tuıaqbaev.
Ótinimdi qabyldaý erteń tańǵy saǵat 09.00-den bastalady.
