Almatyda 4 kúnnen beri eshkim aýrýhanaǵa menıngokokk juqpasyna kúdikpen túspegen
ALMATY. QazAqparat - Almatyda 4 kúnnen beri menıngokokk juqpasymen aýrýhanaǵa naýqastar túspegen. Bul týraly qalalyq densaýlyq saqtaý basqarmasynyń baspasóz konferentsııasynda aıtyldy, dep habarlaıdy QazAqparat tilshisi.
Dárigerlerdiń aıtýynsha, búginde qalada 17 adam menıngıtpen aýyryp jatyr, onyń 7-eýi balalar eken.
«Sońǵy úsh kún ishinde menıngokokk juqtyrdy degen kúdikpen eshkim aýrýhanaǵa jatqan joq. Bul aýrýmen sońǵy ret 3 maýsym kúni túsken. Alaıda, buǵan qaramastan patsıentterdiń arasynda menıngokokk juqpasymen qaralyp jatqandar azaımaı tur. Tumaý men aýyrǵandardy da tekseremiz. Búginde palatada menıngokokk juqpasymen 10 adam jatyr. Densaýlyqtary qanaǵattanarlyq deńgeıde. Olar jansaqtaý bóliminen boks bólimine kóshirildi. Onyń úsheýi úıge shyǵý úshin saraptama qorytyndysyn kútip otyr», - dedi I.S.Jekenova atyndaǵy qalalyq klınıkalyq juqpaly aýrýlar aýrýhanasynyń bas dárigeriniń orynbasary Tamara Taǵanova.
Balalar qalalyq klınıkalyq juqpaly aýrýlar aýrýhanasynda menıngokokk vırýsyn juqtyrǵan 7 bala jatyr.
«Balalardyń densaýlyǵy qanaǵattanarlyq deńgeıde. Eń kishkentaı naýqasymyz 1,5 jasta. Almatyda 13 adam menıngokokk juqpasymen aýyrǵan bolatyn. Olardyń 4-eýi úıine shyǵaryldy. Denedegi bórtpe ketpeıinshe eshkimdi aýrýhanadan shyǵarmaımyz», - dedi balalar qalalyq klınıkalyq juqpaly aýrýlar aýrýhanasynyń bas dárigeri Erjan Seralın.
Eske sala ketsek, Almatyda menıngokokk ınfektsııasyn juqtyrdy degen kúdikpen 48 adam tekserilip, onyń 41-inde aýrý rastalǵan edi. Menıngokokk ınfektsııasynyń jyldam túrinen 6 adam qaıtys boldy. Onyń 4-eýi eresek adam, 2-eýi bala bolatyn.
