Almatyda 4 balasymen taýda qalǵan otbasy qutqaryldy
ALMATY. QazAqparat - Almatyda qutqarýshylar 4 balasymen taýda qalǵan otbasyn qutqardy, dep habarlaıdy QazAqparat tilshisi.
Respýblıkalyq jedel qutqarý jasaǵynyń habarlaýynsha, taýǵa ketken otbasynyń qaıtyp oralmaǵany týraly habarlama senbi kúni kezekshi pýltine túsken.
«4 balasyn ertken erli-zaıypty Talǵar aýdanyndaǵy taýlarǵa kólikpen serýendep shyqqan. Serýennen qaıtyp kele jatqanda qatty nóser jaýyp ketken. Sonyń kesirinen kólik Talǵar aýdanyndaǵy jolsyz jerlerde balshyqqa batyp qalǵan. Ózderi kólikti shyǵaramyn degenshe qarańǵy túsip ketken» delingen habarlamada.
Shuǵyl habarlamadan soń taýǵa qaraı 6 qutqarýshy shyqqan. Taýǵa shyǵyp bara jatqanda qurǵaq jol aıaqtalyp, laı jermen júrýge týra kelgen.
Qutqarýshylar oqıǵa ornyna jetken kezde balalar tońa bastaǵan. Al ata-anasynda sáıkes aıaq kıim bolmaǵan. Qutqarýshylar kólikti shyǵara almaǵan soń, otbasy múshelerin jaıaý alyp túsken. Olar balalardy óz kúrteshelerine orap, 4,5 shaqyrym jer jaıaý alyp júrgen», - dedi jasaqtyń baspasóz qyzmetinen.
Túngi 22:55-te qutqarýshylar otbasyny jedel kólikke jetkizdi.
