Almatyda 4,7 myńnan astam az qamtylǵan otbasyna áleýmettik kómek kórsetildi
Qalalyq ákimdiktiń taratqan aqparatyna sáıkes, Almatyda tótenshe jaǵdaıdyń engizilýine baılanysty halyqtyń barlyq osal toptaryna belsendi áleýmettik qoldaý kórsetilip jatyr. Qarajattar respýblıkalyq jáne jergilikti bıýdjetterden, sonymen qatar «Birgemiz» jáne «Jańa Alataý» qorlarynan bólinip jatyr.
Osylaısha, respýblıkalyq bıýdjetten jalpy 69 myńǵa jýyq qala turǵynyn azyq-túlik jáne turmystyq qajettiliktermen qamtamasyz etý úshin 2 AEK-ten tólendi. Sonyń ishinde birinshi jáne ekinshi toptaǵy múgedekter, 16 jasqa deıingi múgedek balalar, múgedek balasyn kútýshi ata-analar, AÁK alatyndar bar.
Sonymen birge keminde 2 AEK-ten kem emes mólsherde 3 top múgedekteri jáne resmı túrde jumyssyz dep tirkelgen shamamen 24 myń adamǵa tólemaqy berý qarastyrylyp jatyr.
Almaty qalasy boıynsha halyqqa áleýmettik kómekti Elbasynyń bastamasymen qurylǵan «Birgemiz» qoǵamdyq qory kórsetip jatyr. Atalǵan qor halyqtyń osal toptaryna, ıaǵnı 23 myńnan astam adamǵa 50 myń teńgeden bólip tóleý úshin shamamen 1,2 mlrd teńge bólýdi qarastyryp otyr. Olardyń qataryna áleýmettik az qamtylǵandar otbasyna kiretin kópbalaly otbasylar, birinshi toptaǵy múgedekter, múgedek balany qaraýshy ata-analar, eń tómengi zeınetaqy alatyn zeınetkerler men jetimder bar.
«Bul qoldaý sharalarymen qamtylmaǵan muqtaj adamdarǵa azyq-túlik jıyntyqtary (10,5 myń teńge) jáne sanıtarlyq-gıgıenalyq quraldar paketi (10,5 myń teńge) túrinde «Jańa Alataý» qory men «Nur Otan» partııasynyń demeýshilik qarajaty esebinen áleýmettik kómek retinde kórsetiledi.
Osyndaı arnaıy sebetter men jıyntyqtardy 4,7 myńnan astam adam alyp úlgerdi. Olardyń arasynda úılerine baryp qyzmet kórsetiletin jalǵyzbasty zeınetkerler, 2020 jyldyń jańa talaptaryna sáıkes kelmeıtin, 2019 jyldyń sońynda memlekettik AÁK alýshylar qataryndaǵy azamattar bar», - dedi qalalyq ákimdikten.
