Almatyda 4,5 myńnan astam adam qarjy pıramıdalaryna aldanǵan

ALMATY. QazAqparat – Almaty polıtsııasy qarjy pıramıdalaryna qansha adam aldanǵanyn málim etti, dep habarlaıdy QazAqparat tilshisi.

Almaty polıtsııasynyń bastyǵy Arystanǵanı Zapparovtyń aıtýynsha, alaıaqtyqtyń kóp bóligi qarjy pıramıdalarymen baılanysty. Aldanǵandardyń sany shamamen 4,5 myń adam.
«Bir qarjy uıymyna qatysty qylmystyq isti tergeý aıasynda, birneshe jábirlenýshiniń aryzy negizinde tirkelgen isterdiń kóp bóligi bir óndiriske biriktiriledi. Mysaly, Mudarabah Capital-ǵa qatysty qylmystyq istiń – 179 epızody, «Oskar Medıkal» boıynsha 298 epızody biriktirildi, al «Qi Trade» boıynsha 4 myńnan astam jábirlenýshi bar.

Bul rette ınternettegi alaıaqtyqtardyń sanyn azaıtýǵa múmkindik týdy. Oǵan suranysy joǵary tanymal ınternet-platformalardyń ókilderimen jumys kezdesýleri, sondaı-aq BAQ-ta jáne áleýmettik jelilerde ınternet-alaıaqtyqpen kúresý týraly aqparaty bar maqalalar, beınerolıkter turaqty jarııalanýynyń arqasynda qol jetkizildi», – dedi Arystanǵanı Zapparov.
«Kıberqadaǵalaý» aqparattyq júıesi arqyly zańsyz saıttardy anyqtaý úshin ınternet keńistigine monıtorıng júrgizý barysynda elde 800-den astam resýrs buǵattalǵan nemese shektelgen.
Polıtsııa departamentiniń arnaıy tergeý-jedel toby IT-tehnologııalar salasyndaǵy qylmystardy ashý boıynsha jumysyn jalǵastyryp jatyr.
Aıta keteıik, Almatyda Mudarabah Capital qarjy pıramıdasyn qurý jáne basqarý faktisi boıynsha sot jalǵasyp jatyr.