Almatyda 380 oryndyq ınfektsııalyq ortalyqtyń qurylysy bastaldy
ALMATY. QazAqparat – Qala ákimi Baqytjan Saǵyntaev jumys sapary barysynda jańa medıtsınalyq ortalyqtyń qurylysynda boldy, sondaı-aq velosıped mektebi men «Aqbulaq» yqshamaýdanyndaǵy jaıaý júrginshiler aımaǵynyń jobalarymen tanysty, dep habarlaıdy QazAqparat tilshisi.
Almaty ákimi Baqytjan Saǵyntaev Instagram -daǵy paraqshasynda Alataý aýdanyna qarasty «Nurkent» yqshamaýdanyndaǵy bolashaq medıtsınalyq ortalyqtyń qurylys alańynda bolǵanyn jazdy.
Elbasynyń tapsyrmasymen qurylysy bastalǵan ortalyq juqpaly aýrýlarǵa qarsy kúreste medıtsına ǵylymy men tájirıbesin biriktirýge baǵyttalǵan. Jospar boıynsha 380 tósek-orynǵa arnalǵan ortalyq, sonyń ishinde 30 reanımatsııasy bar, 18 aıda boı kóteredi.
Sondaı-aq, Baqytjan Saǵyntaev «Almaty Arena» sport kesheninde ashylǵan velomekteptiń jobasymen tanysty.
«Velosport federatsııasynyń prezıdenti N. Smaǵulovtyń qoldaýymen 12-16 jas aralyǵyndaǵy olımpıada rezerv mamandyrylǵan balalar men jasóspirimder sport mektebi tárbıelenýshileri velosportpen kásibı túrde shuǵyldanýǵa múmkindik aldy. Óz kezeginde bizge sport keshenderiniń áleýetin tıimdi paıdalaný qajet. Sondyqtan sportpen, sonyń ishinde qysqy sport túrlerimen aınalysý úshin ınfraqurylymdy keńeıtýge mán bermekpiz», - dep jazdy megapolıs ákimi.
Almaty ákimi «Aqbulaq» aqshamaýdanynda jaıaý júrginshiler aımaǵy salynatynyn jetkizdi.
«Turǵyndardyń saýaldaryna jaýap bere otyryp, «Aqbulaq» yqshamaýdany Ahanov kóshesindegi jaıaý júrginshiler aımaǵyn salý jobasyn ázirledik. Jańa promenadty dáliz qoǵamdyq keńistikti kórkeıtip, aýdannyń kórikti mekenine aınalady», - dep atap ótti Baqytjan Saǵyntaev.
