Almatyda 38 myńdaı oqýshy mektep avtobýstaryna muqtaj
Almaty qalalyq bilim basqarmasynyń basshysy Lázzat Jylqybaeva brıfıng barysynda «Mektep avtobýstary» jobasy boıynsha monıtorıng júrgizilip jatqanyn atap ótti.
«Ata-analar arasynda saýalnama júrgizdik, qazir 38 myńǵa jýyq balaǵa qajettilik bar. Mektep avtobýstary, eń aldymen asa qajet aýdandarǵa engiziledi. Pılottyq jobada biz tórt aýdandy tańdap aldyq. Atap aıtar bolsam, Bostandyq, Naýryzbaı, Alataý jáne Medeý. Qazir mektepterdi anyqtap jatyrmyz. Olar anyqtalsa, ár mektepke arnaıy marshrýttar jasaımyz. 20, 30, 50 oryndyq avtobýstar bar. Joba kezeń kezeńimen júzege asyrylady», - dedi spıker.
Ol avtobýstardyń naqty qashan oqýshylardy tasymaldaýǵa shyǵatynyn aıtqan joq.
«Kez kelgen mehanızm belgili bir protsedýralardan ótýi kerek: memlekettik satyp alý, jetkizýshini anyqtaý. Qorytyndysy shyqqan boıda bul joba júzege asady. Onyń somasy da belgisiz. Sebebi, balalar men avtobýstardyń sanyn eseptep jatyrmyz», - dedi ol.
Eske salsaq, Almaty ákimi Erbolat Dosaev kelesi jyly «Mektep avtobýstary» baǵdarlamasy júzege asyrylatynyn aıtqan edi.
