Almatyda 37 adam tabıǵı gazdan ýlanyp qaldy
ALMATY. QazAqparat - Almatyda jylytý maýsymy kezinde 37 adam tabıǵı gazdan ýlanyp qaldy. Onyń basym bóligi balalar. Bul týraly brıfıng barysynda qalalyq tótenshe jaǵdaılar departamenti basshysynyń orynbasary Samat Asaınov aıtty, dep habarlaıdy QazAqparat tilshisi.
Departament ókiliniń sózinshe, jeke turǵyn úı sektoryn aralaý boıynsha reıdtik is-sharalar úzdiksiz uıymdastyrylady. Alaıda, júrgizilgen jumystarǵa qaramastan, bıyl 37 adam, onyń ishinde 25 bala tabıǵı gazdan ýlanyp qalǵan.
«Osyǵan oraı, vedomstva shart mindettemelerin oryndamaǵan qyzmet kórsetetin kompanııalarǵa shara qoldaný maqsatynda turǵyn úı saıasaty basqarmasymen birge «Almatygaz ARTs» JShS jospardan tys tekserý júrgizdi. Tekserý nátıjesinde gaz qazandyqtaryna tehnıkalyq qyzmet kórsetý boıynsha jumystardy sapaly qamtamasyz etpegeni jáne ýaqtyly oryndamaǵany úshin «Almatygaz ARTs» JShS QR ÁQBtK-niń 299-baby 4-bóligi boıynsha 100 AEK (306 300 teńge) aıyppul saldy»,- dedi Samat Asaınov.
Sonymen qatar, ol bıyl turǵyn úı sektorynda órt 22% - ǵa azaıǵanyn málim etti. 2021 jylǵy shildeden bastap 1326 áleýmettik osal topqa jatatyn otbasy jáne 1876 beıáleýmettik ómir saltyn ustanatyn adamdar tizimi jasaqtaldy.
«Sol tizimge sáıkes áleýmettik kómek kórsetý boıynsha sharalar qabyldaý úshin aýdandyq ákimdikterge jáne áleýmettik ál-aýqat basqarmasyna joldandy. Júrgizilgen jumystardyń nátıjesinde osy sanattaǵy 127 otbasy 20 aılyq eseptik kórsetkish (58 340tg) mólsherinde aı saıynǵy ataýly áleýmettik kómek kórsetildi. Sonymen qatar, órtten zardap shekken adamdarǵa 4,5 mln teńge kóleminde ótemaqy tólindi»,- dedi spıker.
Budan bólek «Kómek qoly» aktsııasy aıasynda 66 ýly gaz datchıgi ornatyldy. Kómirmen jylytylatyn barlyǵy 1326 jeke turǵyn úı tolyq jabdyqtalǵan.
