Almatyda 360 tonna azyq-túlik arzan baǵamen satyldy
ALMATY. QazAqparat - Almatylyqtar jármeńkeden 360 tonna azyq-túlikti tómendetilgen baǵamen satyp aldy, dep habarlaıdy QazAqparat tilshisi.
Fermerler alyp kelgen 360 tonna azyq-túlik, ekologııalyq taza kókenister men jemis-jıdekter almatylyqtarǵa naryq baǵasynan 10-15 paıyzǵa arzan satyldy.
«Bıyl aýqymy keńeıtilgen jármeńkege biz 195 tonna kókenis, 74 tonna et, 90 tonna sút ónimderi, balyq túrlerin ákeldik. Túske jaqyn jármeńkege ákelgen 187 mln teńgeniń ónimi satylyp ketti», - dedi Almaty oblysy Aýyl sharýashylyǵy basqarmasynyń bólim basshysy Talǵat Alybaev.
Jármeńkege Taldyqorǵan, Qapshaǵaı, Tekeli qalalary men Almaty oblysynyń 16 aýdanynyń sharýalary qatysty.
Megapolıs turǵyndaryna 48 túrli ónim usynyldy. Onyń ishinde, et, shujyq, sút, qymyz, jemis-jıdek, kókenis, dándi-daqyldar, ósimdik maılary bar.
Eske sala keteıik, aımaqaralyq yntymaqtastyq aıasynda Almaty qalasynda osymen 3-shi jármeńke ótkizildi. Jyl sońyna deıin taǵy 7 jármeńke ótpek.
