Almatyda 36 myńnan astam stýdent tegin bilim alyp jatyr

ALMATY. QazAqparat- Almatyda 2025 jylǵa qaraı 9 synyp túlekteriniń 100 %-y kolledjderde qajetti mamandyqtarda tegin oqı alady. Bul týraly brıfıng barysynda qalalyq bilim basqarmasy basshysynyń orynbasary Qaırat Jumanov málim etti, dep habarlaıdy QazAqparat tilshisi.

Spıker memlekettik tapsyrys jyl saıyn ulǵaıyp kele jatqanyn, sonyń arqasynda tehnıkalyq jáne kásiptik bilim berý qoljetimdi bola bastaǵanyn atap ótti. Almaty, elimizdiń basqa óńirleri sııaqty, suranysqa ıe mamandyqtar boıynsha tegin bilim berýmen 100 paıyz qamtýǵa umtylady.

Qaırat Jumanovtyń aıtýynsha, megapolıste 83 kolledj jumys isteıdi, onyń 23-i memlekettik, 60-y jeke menshik. Barlyǵy 73 719 stýdent oqıdy, onyń ishinde memlekettik tapsyrys boıynsha 36,5 myń adam. Bul - 49,5 paıyz. «Sapaly bilim berý» ulttyq jobasyn iske asyrý úshin 2025 jylǵa deıin memlekettik tapsyrysty eki esege – 21 myń orynǵa deıin ulǵaıtý josparlanyp otyr. Birinshi kezekte 9 synyp túlekterin 2025 jylǵa qaraı 100%-ǵa deıin tegin tehnıkalyq jáne kásiptik bilimmen qamtý josparlanýda», - dedi Qaırat Jumanov.

Osylaısha, 2025 jyly qalalyq kolledjderde oqýǵa nıet bildirgen barlyq 9-synyp túlekteri suranysqa ıe mamandyqtar boıynsha tegin bilim ala alady.