Almatyda 355 qutqarýshy men órt sóndirýshi táýlik boıy kezekshilik etedi
ALMATY. QazAqparat – Almaty qalalyq TJD bastyǵynyń orynbasary Arman Baıgelov turǵyndardy karantın kezinde órt qaýipsizdigin saqtaýǵa shaqyrdy, dep habarlaıdy QazAqparat tilshisi.
Karantın kezinde Almaty turǵyndarynyń qaýipsizdigin qamtamasyz etý úshin QR ІІM-niń buıryǵymen 1525 qutqarýshy qyzmet atqarýdyń erekshe rejımine aýystyrylǵan. Táýlik boıy jedel qoldanýǵa 118 birlik tehnıka berilgen jáne 355 qutqarýshy jáne órt sóndirýshi qyzmet etýge daıyn.
«Biz qala turǵyndaryn tótenshe jaǵdaı rejıminen habardar etip, aqparattandyrý úshin kúnine 5 ret 510 teledıdar men 22 radıo arna arqyly aqparat taratamyz. Qalada 24 karantın oshaǵy dep tabylǵan úıler bar. Ol jerlerde úı turǵyndaryna kirip-shyǵý shektelgen. Páter ıeleri kooperatıviniń basshylary osyndaı páterlerdiń birinen órt shyqqan jaǵdaıda barlyq kireberistegi páterlerdiń turǵyndary evakýatsııalanatynyn túsingeni durys. Olar úshin aldyn ala basqa kire beristen turǵyndarmen aralaspaıtyndaı oryn anyqtaý kerek», – deıdi Arman Baıgelov.
Sonymen qatar, ol almatylyqtardy qarapaıym órt qaýipsizdigi erejelerin saqtaýǵa shaqyrdy.
«Balalardy qaraýsyz qaldyrmańyz, olardy órt kezinde qoldanatyn is-áreketke úıretińiz. Tósekte temeki tartýǵa bolmaıdy. Gaz jáne elektr quraldaryn qoldanǵanda asa muqııat bolý qajet. As úıde nemese páterden gaz ıisin sezseńiz elektr jarǵyn qospańyz. Gazdy jaýyp, qutqarý nemese gaz qyzmetin shaqyryńyzdar. Sondaı-aq elektr symdarynyń durystyǵyn baqylańyzdar. Qoldan jasalǵan elektr aspaptaryn qoldanýǵa bolmaıdy», – dedi ol.
Sondaı– aq, ol aldyn alý boıynsha birneshe eskertpe ázirlegenderin jáne olardy turǵyndardyń telefondaryna WhatsApp arqyly jiberiletinin aıtty.
