Almatyda 350 myń túp aǵash otyrǵyzylady
ALMATY. QazAqparat –Almatyda bıyl 350 myń túp aǵash otyrǵyzylady. Osylaısha, jergilikti atqarýshy organdar Jasyl Almaty-nyń 1 mıllıon aǵash otyrǵyzý aktsııasyn aıaqtaıdy, dep habarlaıdy QazAqparat tilshisi.
Almaty qalalyq jasyl ekonomıka basqarmasy basshysynyń mindetin atqarýshy Serik Ádilbaevtyń aıtýynsha, búginde megapolıste 705 myń aǵash kósheti otyrǵyzyldy.
«Bıyl bizde 350 myń jasyl jelek otyrǵyzý jospary bar, onyń ishinde 72 346 kóshet otyrǵyzyldy. Jalpy, osy ekpeler esebinen 1 mıllıon aǵash otyrǵyzý arqyly Jasyl Almaty aktsııasyn aıaqtaýdy josparlap otyrmyz», - dedi Serik Ádilbaev.
Spıker Almatynyń jasyl ekonomıka basqarmasynyń aldynda qalalyq ekojúıeni biriktiretin jáne bıoártúrlilikti qoldaıtyn qalanyń «jasyl jelisin» qurý boıynsha mańyzdy mindet turǵanyn atap ótti. Sondyqtan aǵash otyrǵyzý 2022 jyldyń kúzinde jalǵasady. Ol kezde 277 654 jas kóshet otyrǵyzý josparda. Sonymen qatar, ol magıstraldy joldar, jolaıryqtar, temirjoldar boıynda, kóppáterli turǵyn úı keshenderiniń aýmaqtarynda, ózen jaǵalaýlarynda, saıabaq jáne sanıtarlyq-qorǵaý aımaqtarynda aǵash otyrǵyzylatynyn jetizdi.
«Aǵash otyrǵyzý kezinde dendrolog ǵalymdardyń usynymdary eskerildi, olar kádimgi qaraǵaı, qazaqstandyq terek, usaq japyraqty qaraǵaı, qaıyń, shaǵan, jalǵan akatsııa, súıir japyraqty úıeńki, kashtan, robınııa, jalǵan akatsııa, kópirshik, dolana, alma, órik otyrǵyzýdy usynady», - dep atap ótti spıker.
Almaty turǵyndaryna kóshetterdi tegin taratý boıynsha «Jasyl aýla» aktsııasy da jalǵasady. «Kúzde megapolıs turǵyndaryna 2 myńǵa jýyq kóshet taratýdy josparlap otyrmyz. Sondaı-aq birjyldyq jáne kópjyldyq gúlzarlardy otyrǵyzý 2023 jylǵa deıin jalǵasady. Jalpy somasy 2,1 mlrd teńgege merdigerlik uıymdarmen 10 shart jasaldy. Gúl otyrǵyzý sáýir aıynda bastaldy, óıtkeni bul kezeń eń qolaıly. Sándik-gúlmen kógaldandyrýdyń jalpy kólemi shamamen 159 myń sharshy metr», - dedi ol.
