Almatyda 35 núktede jyljymaly jedel járdem stansasy ashylady
ALMATY. QazAqparat - Almatyda jyljymaly bloktyq jedel járdem stansalary ashylady. Bul týraly búgin qalalyq Kardıologııalyq ortalyqta bolǵan jıyn barysynda Densaýlyq saqtaý basqarmasynyń basshysy Serikbol Mýsınov aıtty.
Búgin QR Parlamenti Májilisiniń depýtattary qalalyq Kardıologııalyq ortalyqtyń aqparattyq ınnovatsııalyq jetistikterin kórdi.
«Jedel járdem qyzmeti boıynsha basty basymdyqtardy anyqtadyq. Qalamyzdyń ereksheligine oraı, jedel járdem kólikteri keı jaǵdaıda naýqasqa keshigip jetedi. Osyǵan baılanysty 35 jerde jyljymaly bloktyq jedel járdem júıesin iske qosatyn bolamyz. Onda eki brıgada jumys jasaıtyn bolady. Qansha jerden stansa salsa da bul shyǵyn. Keptelistiń kesirinen naýqasqa jetý ýaqyty uzap ketedi», - dedi Serikbol Mýsınov.
Onyń aıtýynsha, jedel járdem kóligin satyp alý júıesi de ózgeriske ushyramaq. Endigi kezekte memlekettik tendermen jumys jasaıtyn avtokásiporyndar jylyna eki ret avtoparkti jańartý shartymen kelisýi tıis.
Sonymen qatar, jyl sońyna deıin Almatyda medıtsınalyq mekemeler biryńǵaı bazaǵa biriktiriledi.
Endi naýqas týraly aqparat ol jedel járdemmen aýrýhanaǵa jetkenshe dárigerlerdiń qolynda bolady. Osynyń arqasynda naýqastardy tekserip, emdeý ýaqyty qysqarady.
