Almatyda 35 myń dári zańsyz saýdadan alyndy
ALMATY. QazAqparat – Almaty polıtsııasy zańsyz dári-dármek satqan eki azamatty ustady, dep habarlaıdy QazAqparat tilshisi.
«Úsh kún ishinde dári-dármekter men medıtsınalyq maqsattaǵy buıymdardy zańsyz satý boıynsha 11 faktiniń joly kesildi. Tintý kezinde 24 myń dári-dármek quraldary bar 1200 paket, sondaı-aq jalpy somasy 2,5 mıllıon teńgeni quraıtyn COVID-19 anyqtaıtyn 9 myń ekspress-test alyndy. Tárlkilengen zattardyń arasynda qytaılyq Paratsetamol da boldy. Qazirgi ýaqytta bul preparatty Qazaqstanǵa jetkizý arnasy anyqtalýda. Barlyq faktiler boıynsha sotqa deıingi tergeý júrgizilýde», - dedi Almaty qalalyq Polıtsııa departamentiniń bastyǵy Qanat Taımerdenov.
Búgin krımınaldyq polıtsııa basqarmasynyń qyzmetkerleri Almaty qalasy boıynsha ekonomıkalyq tergeý departamentimen birlesip opa-dalap satatyn dúkende jerasty dárihanasyn ashqan eki azamatty ustady. Dúkende qyzmettiń osy túrine lıtsenzııasy bolǵan joq. Tergeý barysynda atalǵan mekemede 11 myńnan astam ártúrli dári-dármek jáne jalpy somasy 1 119 200 teńgeni quraıtyn 100-den astam ampýla tárkilendi.
Eske salaıyq, QR Prezıdenti Q.K. Toqaevtyń tapsyrmasy boıynsha Іshki ister mınıstrligi elimizde reıd ótkizip jatyr.
Tekserýdiń maqsaty – karantın ýaqytynda qajetti dári-dármekterdiń jetispeýshiligin paıdalanyp, respıratorlyq-vırýsty aýrýlardy emdeýge arnalǵan dári-dármekterdi joǵary baǵamen satqan dárihana qyzmetkerleri men azamattardy anyqtaý.
