Almatyda 34 baǵdarsham nysany ornatylady – Saǵyntaev
«Biz qaýipsiz, qoljetimdi ári jaıly kóshe ınfraqurylymyn qurýǵa tyrysamyz. Negizgi basymdyq – jaıaý júrginshiler qaýipsizdigi. Osy baǵdarlama aıasynda 2020 jyly 316 ýchaskeniń jolyna jasandy qısyq tósemder ornatyldy. Sondaı-aq 120 mekteptiń aldyna18 trapetsııa tárizdi ótkelder qoıyldy. 15 baǵdarsham ornattyq, 115 jańa rettelmegen jaıaý júrginshiler ótkeli jabdyqtaldy, 10 qaýipsizdik araly uıymdastyryldy. Bıyl da bul baǵdarlama jalǵasyn tapty. Sondaı-aq 34 baǵdarsham nysany ornatylady», - deıdi Almaty ákimi.
Sonymen qatar, ol byltyr «Sergek» kameralarynyń sany 464 keshende 2 myńnan astam birlikke jetkizilgenin atap ótti.
«Kameralar ózderiniń tıimdiligin kórsetti: joldardaǵy ólim-jitim 48%-ǵa, jazataıym oqıǵalar sany 29%-ǵa azaıdy. Ótken jyly kameralardyń kómegimen 900 myń quqyq buzýshylyq anyqtaldy. 2021 jyldyń qańtarynan maýsymyna deıin 600 myńnan astam buzýshylyqtar tirkeldi. Júıe qylmystyq quqyq buzýshylyqtardy sheshýde belsendi qoldanylady. Osylaısha, «Sergek» kameralarynyń kómegimen 50-den astam qylmystyq quqyq buzýshylyq ashyldy. Bıyl «Sergek» jobasyn 766 keshenge, qıylystary men syzyqtyq ýchaskelerinde árqaısysy 383 keshenge, jalpy sany 5 myńnan astam kameraǵa deıin keńeıtý josparlanyp otyr», - dedi ákim.