Almatyda 34 adamnyń búıregi almastyryldy

ALMATY. QazAqparat – Osy jyldyń birinshi jartysynda almatylyqtar MÁMS júıesi arqyly jalpy quny 79,2 mlrd teńgege medıtsınalyq kómek túrlerin paıdalandy. Bul týraly óńirlik kommýnıkatsııalar qyzmetiniń alańynda ótken brıfıngte Medıtsınalyq saqtandyrý qorynyń Almaty qalalyq fılıaly dırektory Tileýhan Ábildaev málim etti, dep habarlaıdy QazAqparat tilshisi.

Onyń aıtýynsha, shyǵynnyń basym bóligi, ıaǵnı 44,1 mlrd teńge statsıonarlyq medıtsınalyq kómekke, 3,2 mlrd teńge kúndizgi statsıonarlar kórsetken qyzmetterge tólendi. «Medıtsınalyq kómekke júgingen azamattar tarapynan emdeý men dıagnostıkanyń baǵasy qymbat túrleri, salalyq mamandardyń konsýltatsııalary, sondaı-aq zerthana taldaýlaryna degen suranys joǵary bolǵan. Jarty jylda atalǵan qyzmetterge 14,6 mlrd teńge jumsaldy», - dedi fılıal basshysy.

Fılıal basshysynyń sózine qaraǵanda, sonyń ishinde kompıýterlik tomografııa men magnıtti-rezonanstyq tomografııaǵa (KT/MRT) degen suranys burynǵysha joǵary kúıinde qalyp otyr. Alty aıda Almaty qalasynda jalpy somasy 890,5 mln teńgege 46 myńnan astam kompıýterlik tomografııa jasalǵan.

Qor 33 myńnan astam MRT qyzmetine 542 mln teńge bóldi. Sonymen qatar onkologııalyq naýqastardy nysanaly túrde tekserýge arnalǵan 6,4 myń pozıtrondy-emıssıondyq tomografııa jasalǵan. Oǵan 2,2 mlrd teńgeden astam qarjy tólengen. «Mindetti áleýmettik medıtsınalyq saqtandyrý esebinen kún saıyn quny birneshe mıllıonǵa jetip jyǵylatyn joǵary tehnologııaly operatsııalar jasalyp jatyr. Osy jyldyń 6 aıynda Almaty qalasynda osyndaı otalarǵa 11,7 mlrd teńge jumsaldy. Jarty jylda almatylyq statsıonarlar mıdaǵy qan-tamyrlary men qan-tamyr júıelerine 2 226 ota jasaǵan.

Operatsııalardyń jalpy quny 2,7 mlrd teńgeden asty. Sonymen qatar saqtandyrýdyń arqasynda transplantologııalyq operatsııalar da kedergisiz jasalyp jatyr. Jarty jylda 34 búırek almastyryldy, onyń jalpy quny – 170 mln teńge», - dedi Tileýhan Ábildaev.